Öryggisreglur Kárahnjúka hertar

Búist er við tugþúsundum ferðamanna að Kárahnjúkum í sumar. Öryggisreglur hafa verið hertar en brögð hafa verið að því að ferðamenn fari inn á bannsvæði. Fyrir þá sem ferðast um Fljótsdalshérað er freistandi að lengja ferðalagið og skoða framkvæmdirnar við Kárahnjúka. Stórkostlegt útsýni fæst þegar ekið er upp brekkuna í átt að Kárahnjúkum en þangað liggur nú malbikaður vegur og Landsvirkjun beinlínis býður fólk velkomið að kynna sér verkefnið. Í félagsheimilinu Végarði við kirkjustaðinn Valþjófsstað er rekin upplýsingamiðstöð þar sem meðal annars má sjá líkan af rosabor en þrír slíkir 120 metra langir bora jarðgöng virkjunarinnar. En sennilega eru það gljúfrið mikla og framkvæmdirnar þar sem hafa mesta aðdráttaraflið. Hrönn Hjálmarsdóttir, kynningarfulltrúi Kárahnjúkavirkjunar, segir fleiri þúsundir ferðamanna hafa skoðað svæðið í fyrra og því megi búist við vel á annað þúsund ferðamanna í ár. Við Kárahnjúka hefur Landsvirkjun búið til útsýnispall með upplýsingaskiltum þar sem sjá má yfir aðalvinnusvæðið. Þar eru líka viðvörunarskilti sem banna umferð óviðkomandi en að sögn Þorgríms Stefáns Árnasonar, öryggisfulltrúa á svæðinu, hafa margir íslenskir ferðamenn virt þau að vettugi. Öryggisreglur hafa af þeim sökum verið hertar.