Tekin af lista ráðuneytisins

Hafnarstjórn í Grundarfirði hefur óskað eftir því við sjávarútvegsráðuneytið að Grundarfjarðarhöfn verði tekin út af lista þrettán hafna þar sem hrefnuveiðibátar geta landað. Grundarfjarðarhöfn lenti á þessum lista án vitundar hafnaryfirvalda, sem vilja ekki vera skilgreind sérstaklega sem hrefnuveiðihöfn þótt þau styðji hrefnuveiðar í vísindaskyni. Hrefnuveiðibátarnir teljast vopnuð skip og vegna stórhertrar siglingaverndar, sem á að taka gildi um næstu mánaðamót sem liður í baráttunni gegn hryðjuverkum, hefur Ríkislögreglustjóri ritað lögreglustjórum bréf og hvatt til sérstaks eftirlits með bátunum vegna þess. Erlend skemmtiferðaskip hafa viðkomu í Grundarfirði í auknum mæli og í bréfi til ráðuneytisins segir að lagt hafi verið í mikinn kostnað við að uppfylla skyldur hafnarverndar vegna þeirra. Hafnaryfirvöld hafi ekki óskað eftir því að Grundarfjaraðrhöfn væri flokkuð sem sérstök löndunarhöfn fyrir hrefnuveiðibáta og á það sé að líta að þeir hafi aldrei landað þar. Eftir sem áður þýði þetta ekki bann við því.