Villtir fasanar færa út kvíarnar

Svo virðist sem villtir fasanar hafi verið að færa út kvíarnar hér á landi. "Fasönum var sleppt í Hallormsstaðarskóg með leyfi landbúnaðarráðuneytisins fyrir nokkrum árum. Það voru allt karlfuglar," sagði Kristinn Haukur Skarphéðinsson líffræðingur hjá Náttúrufræðistofnun. "Svo hafa menn annað hvort sleppt eða misst út fasana á fleiri stöðum, þannig að þeir hafa sést alla vega á tveimur stöðum þar sem þeir eiga ekki vera. Annars vegar hafa þeir sést innarlega í Fljótsdal og hins vegar úti í Jökulsárhlíð. Síðan eru sögusagnir um að þeir hafi sést á tilteknum stað í öðrum landshluta, en það hef ég ekki fengið staðfest." Kristinn Haukur sagði að villtir fasanar gætu lifað góðu lífi hér á landi. Þeir lifðu við miklu verri skilyrði annars staðar. Hins vegar væri ekki vitað hvort þeir gætu ættu auðvelt með að fjölga sér við þau skilyrði sem væru hér á landi. Hann sagði enn fremur, að þeir lifðu á grófu korni, fræjum og skordýrum. Þeir væru mjög duglegir að bjarga sér.