Óhugnanlegt návígi við gosstöðvarnar

14. apríl 2010 21:07

Myndin sem Ólafur tók sýnir ótrúlegt návígi við eldgosið.

„Þetta er bara óhugnanlegt" sagði Ólafur Eggertsson á Þorvaldseyri en hann sendi Vísi þessa mögnuðu mynd sem sýnir návígi býlisins við eldstöðvarnar.

„Það eru þvílíkar sprengingar og svartir taumar sem teygja sig lengst upp í loftið. Þetta er eins og í Surtseyjargosinu," segir Ólafur sem þarf ekki annað en að líta upp til himins til þess að sjá hrikalegar afleiðingar gossins.

Hann segir bæinn hinsvegar hafa sloppið ótrúlega vel. Þó hafi orðið heitavatnslaust á bænum. Sjálfur þurfti hann að flýja bæinn í morgun en þá vissi hann ekkert hvað myndi gerast. Hann er því sáttur við að ekki fór verr.

Varnagarðar við bæinn eyðilögðust að hluta til. Þó stendur varnaveggur sem var hlaðinn fyrir um 50 árum síðan. Annar veggur styttist um 50 metra þegar flóð skall á.

Ólafur segir að lokum að það sé ótrúlegt horfa upp hlíðarnar á gosið.

„En þetta er bara eitthvað sem maður þarf að lifa með," sagði Ólafur.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.