Getur ekki afturkallað greiðslur frá Milestone til Ingunnar

Skiptastjóri þrotabús Milestone mun ekki geta afturkallað greiðslur upp á alls 5,2 milljarða króna til Ingunnar Wernersdóttur, systur Wernersbræðra, þar sem þær áttu sér stað meira en tveimur árum áður en Milestone fór í greiðslustöðvun.

Kaup Magma í HS hugsanlega ólögleg

Kaup kanadíska félagsins Magma Energy í HS orku, kunna að fara á svig við íslensk lög, að mati Lagastofnunar Háskólans. Endanleg niðurstaða um lögmætið fáist ekki nema fyrir dómstólum.

Össur hækkaði um 2,34%

Eik banki hækkaði um 7,19% í dag í viðskiptum sem námu 14 þúsund krónum. Össur banki hækkaði um 2,34% í viðskiptum sem námu tæpum 96 milljónum króna og Marel hækkaði um 0,16% í viðskiptum sem námu 86 milljónum króna.

Velta skuldabréfa nam 6,52 milljörðum í dag

Heildarvelta skuldabréfa á markaði í dag nam 6,52 milljörðum króna. Þar af var velgta með verðtryggð íbúðabréf 1,05 milljarðar og venta með óverðtryggð ríkisbréf nam 5,47 milljarða króna.

Völusteinn kaupir Festi á 3,2 milljarða

Skrifað hefur verið undir samning milli Jóns Auðunar Jónssonar hrl., skiptastjóra þrotabús útgerðarfyrirtækisins Festar ehf. í Hafnarfirði og eigenda Útgerðarfélagsins Völusteins ehf., um að Útgerðarfélagið Völusteinn ehf. kaupi allan rekstur og eignir þrotabúsins, sex báta, fiskvinnslu og aflaheimildir. Kaupverðið er 3,2 milljarðar króna að því er fram kemur í tilkynningu frá Landsbankanum. Útgerðarfélagið Völusteinn ehf. er í eigu Ólafs Jens Daðasonar skipstjóra og Gunnars Torfasonar sjávarútvegsfræðings.

Íslenskur tölvuleikur um Þór vekur athygli á iTunes

Íslenskur tölvuleikur, iPhone leikurinn Þór - Sonur Óðins, er kominn út í iTunes verslun Apple. Leikurinn er byggður á sögu úr væntanlegri kvikmynd CAOZ um þrumuguðinn Þór. Í tilkynningu segir að leikurinn sé gefinn út af bandaríska fyrirtækinu Freeverse sem m.a. hefur sett á markað í iTunes verslunni tvo af 10 söluhæstu leikjum Apple-verslunarinnar frá upphafi. „Leikurinn hefur fengið mjög góðar viðtökur hjá þeim notendum sem hafa gefið honum góða einkunn. Leikurinn er þegar kominn á listann yfir 40 tekjuhæstu ævintýraleikina í verslun Apple, auk þess sem hann er á lista yfir nýja leiki sem þykja athyglisverðir að mati verslunarinnar.“

Feðgarnir í Fjarðarkaupum menn ársins

Feðgarnir í Fjarðarkaupum eru menn ársins 2009 í íslensku atvinnulífi, að mati Frjálsrar verslunar. Þetta eru þeir Sigurbergur Sveinsson og synir hans Sveinn og Gísli Þór.

Þrjú skuldbindandi tilboð í Skeljung og tengd félög

Fyrirtækjaráðgjöf Íslandsbanka hf. bárust þrjú skuldbindandi tilboð með fyrirvörum í 49% hlut í Skeljungi hf. og tengdum félögum að því er fram kemur í tilkynningu frá Íslandsbanka. Tilboðin voru opnuð mánudaginn 21. desember í viðurvist Sigurðar Páls Haukssonar, löggilts endurskoðanda, sem var tilnefndur sem óháður matsaðili.

Neytendur svartsýnir í árslok

Íslenskir neytendur eru langt frá því að vera bjartsýnir á horfur í efnahags- og atvinnumálum nú í árslok samkvæmt Væntingavísitölu Gallup sem birt var í hádeginu. Annan mánuðinn í röð lækkar vísitalan sem að mati Greiningar Íslandsbanka bendir til þess að svartsýnin í garð efnahags- og atvinnuástandsins sé að aukast og ráði ríkjum á meðal íslenskra neytenda um þessar mundir. Í Morgunkorni bankans kemur fram að þetta er svipuð þróun og annars staðar.

Yfir 17 þúsund kröfum lýst í þrotabú Kaupþings

Yfir 17 þúsund kröfum hefur verið lýst í þrotabú Kaupþings, samkvæmt upplýsingum fréttastofu. Kröfulýsingafresturinn rennur út á miðnætti á morgun, 30. desember.

Stjórnarkjör Íslandsbanka: Beðið eftir staðfestingu FME

Tilnefning Árna Tómassonar og Jóns Sigurðssonar í bankaráð Íslandsbanka bíður nú staðfestingar FME. Árni Tómasson er í stjórn Alfesca, en fyrirtækið er stór skuldari hjá Íslandsbanka.

Gjaldþrot Seðlabankans vegur þungt

Vextir og verðbætur af skuld ríkissjóðs vegna gjaldþrots Seðlabankans samsvara öllum þeim skattahækkunum sem boðaðar hafa verið á næsta ári að sögn Jóhönnu Sigurðardóttur forsætisráðherra. Hún segir að ef Icesave frumvarpið verði fellt muni það tefja endurreisn efnahagslífsins.

Ekkert nýtt að frétta af sölumálum West Ham

Hópur bandarískra fjárfesta með aðsetur í London ætlar að gera tilboð í enska knattspyrnuliðið West Ham United sem er í eigu Straums. Sky Sports greinir frá þessu og segir að fjárfestingafélagið Inter Market ætli sér að bjóða 100 milljónir punda í félagið sem er 50 milljónum meira en nafnarnir David Gold og Sullivan buðu fyrr í mánuðinum. Því boði var hafnað af CB Holding, dótturfélagi Straums. Upplýsingafulltrúi Straums segir ekkert nýtt í stöðunni.

Breskt atvinnuástand versnar áður en það batnar

Breska vinnumálastofnunin spáir því að ekki fari að sjá til sólar í atvinnumálum þar í landi fyrr en eftir mitt ár 2010 en þangað til eigi að minnsta kosti 250.000 manns til viðbótar eftir að missa vinnuna.

Jón skipaði Árna sem tilnefndi Jón og sig sjálfan í bankastjórn

Árni Tómasson, formaður skilanefndar Glitnis, hefur tilnefnt sjálfan sig í stjórn Íslandsbanka. Jón Sigurðsson hefur verið tilnefndur sem formaður í stjórn bankans. Jón var stjórnarformaður Fjármálaeftirlitsins á síðasta ári þegar skilanefnd Glitnis var skipuð, en Árni Tómasson var einmitt skipaður af FME.

HS orka komin í eigu erlendra aðila

HS orka, orkufyrirtæki Reyknesinga, er nú að meirihluta í eigu erlendra aðila. Nefnd um erlendar fjárfestingar hefur vikum saman fjallað um kaup kanadíska félagsins Magma Energy á stórum hlut í fyrirtækinu. Reiknað er með niðurstöðu eftir áramót.

Móðurfélag Norðuráls hækkaði um 8,2%

Century Aluminum Company hækkaði um 8,2% í 15 milljóna króna viðskiptum í Kauphöllinni í dag. Atlantic Petroleum hækkaði um 4,92%, Føroya Banki hækkaði um 1,17% og Marel hækkaði um 0,32%

Lítil viðskipti með skuldabréf í dag

Skuldabréfavísitala GAMMA, GAMMA: GBI hækkaði um 0,11% í frekar litlum viðskiptum í dag. Mjög lítil velta var með verðtryggð bréf eða einungis 85 milljónir en GAMMAi: Verðtryggt hækkaði um 0,12%. Meiri velta var með óverðtryggð bréf eða 6 milljarðar og hækkaði GAMMAxi: Óverðtryggt um 0,08%.

Fjöldi fólks sá Bjarnfreðarson um helgina

Uppselt var á 29 sýningar á íslensku myndinni Bjarnfreðarson um helgina en myndin var sýnd í 17 sölum víðsvegar um landið.

Skuldir vegna Icesave minni en áður hefur verið talið

Tölur um skuldir þjóðarbúsins sýna að skuldir vegna Icesave sem hlutfall af erlendum heildarskuldum þjóðarbúsins eru minni en áður hefur verið talið. Þetta sýna tölur sem Seðlabankinn kynnti fyrir viðskiptanefnd Alþingis fyrir jól. Þar kemur fram að árið 2011 verði mjög erfitt fyrir ríkissjóð en þá mun endurgreiðsla erlendra lána nema rúmlega 1,4 milljörðum króna. Gert er ráð fyrir að árið 2021 hafi ríkissjóði tekist að greiða niður öll þau erlendu lán sem á honum hvíla í dag.

Framleiðsla japanskra fyrirtækja jókst

Framleiðsla japanskra fyrirtækja jókst níunda mánuðinn í röð í nóvember. Aukningin nam 2,6% frá fyrri mánuði, eftir því sem fram kemur á vef BBC. Þessi aukning var meiri en vænst hafði verið og er ástæðan aukinn útflutningur frá Japan.

Húsnæðisverð mun hækka í Bretlandi

Búist er við því að húsnæðisverð í Bretlandi muni hækka á næsta ári um eitt eða tvö prósent, samkvæmt spám greiningaraðila þar í landi. Frá þessu er greint á vef breska blaðsins Telegraph. Þá er jafnframt búist við því að sölusamningum muni fjölga í 70 þúsund úr 55 þúsund. Ástæðan fyrir hærra húsnæðisverði er sögð vera húsnæðisskortur á markaðnum. Þrátt fyrir hærra húsnæðisverð er búist við því að bankar verði tregir til að lána og að fjármögnun fyrstu íbúðakaupa verði mörgum erfið.

Þrjátíu yfirheyrslur vegna Exeter-málsins

Þrjátíu yfirheyrslur hafa átt sér stað í tengslum við rannsókn embættis sérstaks saksóknara á Exeter Holding. Meðal þeirra sem hafa verið yfirheyrðir eru Styrmir Þór Bragason, fyrrverandi forstjóri MP banka.

Nefndir ráðuneyta hafa kostað 300 milljónir

Nefndir ráðuneytanna hafa kostað tæpar 300 milljónir króna á árinu, jafnmikið og ríkið ver til að reka Kvennaskólann á næsta ári. Dýrust var nefndin sem kannaði aðbúnað barna í Breiðavík, á Kumbaravogi og Bjargi.

Steingrímur vill halda í krónuna - ósammála Mats Josefsson

Fjármálaráðherra segir að reynsla þessa árs hafi sannfært hann enn betur um kosti þess að hafa íslensku krónuna. Hann er enn fullviss um að Íslendingar eigi að standa utan Evrópusambandsins og telur ólíklegt að þjóðin fái samning út úr aðildarviðræðum sem verði svo góður að það verði mikið álitamál.

Stjórnarandstaðan krafðist ekki að trúnaði yrði aflétt

Þingmaður Framsóknarflokksins og nefndarmaður fjárlaganefndar, Höskuldur Þórhallsson, mótmælir því að það hafi verið að kröfu stjórnarandstöðunnar sem álit lögmannsstofunnar Mischa de Reyja, hafi verið gert opinbert þrátt fyrir viðvaranir stofunnar sjálfrar.

Femínistar fagna dræmri sölu á Barbie dúkkum

„Ég fagna samdrætti í sölu á Barbie dúkkum,“ segir Guðný Gústafsdóttir, talskona femínista, en sala á Barbie dúkkum í Bretlandi hefur dregist saman um 42 prósent á árinu samkvæmt breska blaðinu Guardian. Dúkkan fagnar fimmtugsafmælinu sínu í ár og svo virðist sem plastfegurðin hafi fölnað því Barbie hefur vissulega munað fífil sinn fegurri.

Ný stjórn skipuð í Íslandsbanka

Búið er að skipa nýja stjórn í Íslandsbanka samkvæmt heimildum Vísis en það kom einnig fram í hádegisfréttum RÚV.

Álit hagstætt Bretum og Hollendingum opinberað þrátt fyrir viðvaranir

Álit bresku lögmannsstofunnar Mischon de Reyja um Icesave, var birt rétt fyrir jól, þrátt fyrir að lögmenn hefðu varar eindregið við því í ljósi þess að það gæti gagnast Bretum og Hollendingum í hugsanlegum málaferlum vegna Icesave. Þetta kom fram hjá fréttastofu RÚV.

Um 400 innistæðueigendur Kaupþings bíða eftir bótum til 2017

Meira en 400 breskir innistæðueigendur, sem áttu innistæður hjá Kaupþingi, munu þurfa að bíða í átta ár eftir að fá greiddar innistæður sínar til baka.

Samrunar gömlu bankana við nýju bankana heimilaðir

Samkeppniseftirlitið ákvað í gær að heimila yfirtöku gamla Kaupþings á Arion banka annars vegar og yfirtöku Glitnis á Íslandsbanka hins vegar.

Sex milljarða króna lántaka Reykjavíkurborgar frestast um sinn

Reykjavíkurborg hafnaði öllum tilboðum sem bárust í skuldabréfaútboði sem borgarráð samþykkti að fara í þann 1. desember síðastliðinn. Þetta kemur fram í tilkynningu frá borginni sem birtist á vef Kauphallarinnar. Ástæðan er sú að Reykjavíkurborg telur að ávöxtunarkrafan sé of há.

Jólaverslunin svipuð og árið 2007

Kaupmenn eru ánægðir með jólaverslun þó hún hafi farið rólega af stað. Fólk kaupir ódýrari gjafir en áður og íslensk hönnun er vinsæl. Jólaverslunin fór frekar hægt á stað en hefur tekið við sér eftir því sem nær hefur liðið jólum.

Tveir úr peningastefnunefnd voru andvígir ákvörðun Seðlabankans

Tveir nefndarmenn í peningastefnunefnd greiddu atkvæði gegn tillögu seðlabankastjóra um að minnka aðhald peningastefnunnar um 0,5 prósentur á síðasta fundi peningastefnunefndar.

Fitch: Lánshæfismatið óbreytt, horfur áfram neikvæðar

Matsfyrirtækið Fitch Ratings greindi frá því í dag að fyrirtækið hefði staðfest langtímaeinkunnir Íslands í erlendum og innlendum gjaldmiðli, BBB- í erlendri mynt, og A- í innlendri mynt og tekið ríkissjóð af gátlista. Horfur eru neikvæðar. Einkunn fyrir skammtímaskuldbindingar í erlendri mynt er staðfest F3 og landseinkunn BBB-.

Skuldastaða sveitarfélaga ekki öfundsverð

Sveitarfélög söfnuðu skuldum af miklum móð í góðærinu og skuldastaða þeirra er ekki öfundsverð. Sjálfstæði þeirra er stjórnarskrárvarið, en frelsinu fylgir ábyrgð og nú er rekstur sumra sveitarfélaga kominn í ógöngur. Samgönguráðuneytið hefur frá árinu 2001 haft heimildir til að grípa í taumana, en látið hjá líða að gera slíkt.

Marel hækkaði um 0,16%

Marel hækkaði um 0,16% í dag í viðskiptum í Kauphöll Íslands sem námu samtals tæpum 16 milljónum króna.

Viðskipti á skuldabréfamarkaði námu 6,5 milljörðum króna

Heildarvelta skuldabréfa í dag nam 6,54 milljörðum króna. Þar af námu viðskipti með óverðtryggð ríkisbréf 4,83 milljörðum króna en viðskipti með íbúðabréf námu um 1,7 milljörðum króna.

Samdráttur um öll Norðurlönd

Landsframleiðslutölur fyrir þriðja ársfjórðung hafa verið að birtast fyrir Norðurlöndin undanfarna daga og vikur. Í Morgunkorni Íslandsbanka eru þessar tölur teknar saman og sýna þær svo ekki verður um villst að öll þessi hagkerfi hafa verið að takast á við samdrátt og í mörgum tilfellum allverulegan samdrátt á þessu ári.

Mats Josefsson: Hefur ekki trú á smáum gjaldmiðlum

Mats Josefsson ráðgjafi ríkisstjórnarinnar við endurreisn bankanna sér ekki hvernig Ísland geti haldið áfram að vera með eigin gjaldmiðil til framtíðar. Margt jákvætt fylgi því að hafa stóran gjaldmiðil.

Lánið til IG fimmtungur af eigin fé Landsbankans

Fimmtungur af eigin fé Nýja Landsbankans fór í að lána fyrir kaupum á Icelandic Group. Lánið, sem bankinn lánaði skúffufélagi í eigu tveggja sjávarútvegsfyrirtækja, var upp á 26 milljarða króna. Það var veitt rétt eftir bankahrunið í október 2008 til að kaupa 98 prósent hlut í Icelandic Group.

Skattaskjólin aðeins til feluleikja

Skráning félaga í skattaskjólum hefur varla verið til annars en að fela eitthvað, segir Elín Árnadóttir, yfirmaður skattasviðs Pricewaterhousecoopers. Hún bendir á að um áramót taki gildi hér á landi nýjar reglur um að framvegis skuli telja fram tekjur sem fólk hefur af svonefndum aflandsfélögum.

Hafnfirðingar samþykktu fjárhagsáætlun

Fjárhagsáætlun Hafnarfjarðarkaupstaðar fyrir árið 2010 ásamt þriggja ára áætlun fyrir árin 2011-2013 var samþykkt á fundi bæjarstjórnar í gær. Í tilkynningu frá bænum segir að yfirskrift fjárhagsáætlunarinnar sé: Stöndum áfram vörð um velferð og grunnþjónustu.

Vilja halda Festi áfram í bæjarfélaginu

Bæjarstjórn Hafnarfjarðar samþykkti í gær samhljóða ályktun þar sem mikilvægi þess að hafnfirska fiskvinnslufyrirtækið Festi ehf. verði áfram í bænum. Fyrirtækið er komið í þrot og hefur Landsbankanum verið falið af skiptastjóra þrotabúsins að sjá um söluna á því.

Iceland Express til Winnipeg

Iceland Express ætlar að hefja áætlunarflug til Winnipeg í Kanda næsta sumar. Í tilkynningu frá félaginu segir að flogið verði einu sinni til tvisvar í viku, á miðvikudögum og laugardögum, frá og með júníbyrjun. Þar með fjölgar áfangastöðum félagsins í 27 og hafa þeir aldrei verið fleiri.