Þingmenn VG koma skilaboðum til ráðherra með fréttatilkynningum

Eygló Harðardóttir, þingmaður Framsóknarflokksins segir undarlegt að stjórnarliðar sendi frá sér fréttatilkynningar þegar þeir vilja koma einhverju á framfæri við sína eigin ríkisstjórn. Þar vísar hún til tilkynningar sem þingflokkur VG sendi frá sér í gærkvöldi varðandi söluferlið á HS orku. Þar ítrekar þingflokkurinn þá grundvallarstefnu sína að allar auðlindir þjóðarinnar eigi að vera sameign hennar.

Háskólastarfi stefnt í hættu

Sigurður Guðmundsson, forseti heilbrigðisvísindasviðs Háskóla Íslands og fyrrverandi landlæknir, telur að gangi niðurskurðarhugmyndir stjórnvalda í menntamálum eftir muni Háskóli Íslands verða færður áratugi aftur í tímann hvað varðar gæði kennslu og rannsókna.

Heildaraflinn minni milli ára

Heildarafli íslenska fiskiskipaflotans var 20 prósentum minni í tonnum talið í síðasta mánuði, en í sama mánuði í fyrra, samkvæmt Hagstofutölum.

Gerðu ítarlega leit í skipi við Seyðisfjarðarhöfn

Ekki liggur fyrir hvort þrír Hollendingar, sem voru handteknir um borð í gömlu fiskiskipi í Seyðisfjarðarhöfn, hafa verið úrskurðaðir í gæsluvarðhald vegna gruns um fíkniefnamisferli, en fíkniefnadeild lögreglunnar á höfuðborgarsvæðinu hefur tekið við rannsókn málsins.

Þrír ungir menn handteknir með riffil

Þrír ungir menn voru handteknir með ólöglegan riffil og skotfæri í fórum sínum, þar sem þeir voru staddir við Ísólfsskála austan við Grindavík seint í gærkvöldi. Það var vitni sem sá til þeirra og gerði lögreglu viðvart.

Ekki flogið frá Reykjavík

Fyrstu vélar Flugfélags Íslands og Ernis hafa ekki lagt upp frá Reykjavík samkvæmt áætlun núna í morgunsárið, þar sem völlurinn hefur verið lokaður. Horfur eru á að hann opnist innan tíðar en hinsvegar eru vellirnir á Akureyri og Egilsstöðum lokaðir vegna öskufalls, en Egilsstaðaflugvöllur gæti opnast fljótlega. Hinsvegar er núna útlit fyrir að Akureyrarflugvöllur verði lokaður í dag, en það getur breyst þegar líður á daginn. Keflavíkurflugvöllur er opinn og er millilandaflug um hann í fullum gangi.

Stjórnvöld vilja stytta leigutíma Magma á auðlindum

Kanadíska fyrirtækið Magma Energy hefur eignast 98,53 prósenta hlut í HS Orku. Sænskt dótturfélag þess keypti hlut Geysis Green Energy í fyrirtækinu. Stjórnvöld höfðu óskað eindregið eftir því að beðið væri með undirskrift þar til eftir ríkisstjórnarfund í dag, ekki var orðið við þeirri ósk.

Askan getur hindrað alla sjúkraflutninga

Vegna öskufalls kom sú staða upp í Vestmannaeyjum um helgina að erfitt eða ómögulegt hefði verið að koma veikum eða slösuðum undir læknishendur utan eyjanna. Sjúkraflug, hvort sem er með flugvél eða þyrlu, var óhugsandi vegna öskufallsins og vafasamt að fara sjóleiðina.

Lögreglumenn leiða hvor sinn listann

Oddvitar framboðslistanna tveggja í Skaftárhreppi eru lögregluþjónarnir tveir sem starfa í hreppnum, Guðmundur Ingi Ingason varðstjóri og Þorsteinn Kristinsson lögreglustjóri. „Við erum fagmenn á okkar sviði, það er langt því frá að þessi staða trufli okkur," sagði Þorsteinn þegar Fréttablaðið grennslaðist fyrir um málið.

Flytja þarf mörg þúsund fjár af öskusvæðum

Fyrstu kindurnar verða fluttar af öskufallssvæðunum undir Austur-Eyjafjöllum á beitarsvæði innan varnarlínu í dag. Að sögn Hermanns Árnasonar, starfsmanns hjá Búnaðarsambandi Suðurlands, verða á annað hundrað lambær fluttar á jörðina Þverá í Skaftárhreppi.

Mun verjast af fullum krafti

Jón Ásgeir Jóhannesson sendi frá sér yfirlýsingu vegna afsagna sinna úr stjórnum bresku fyrirtækjanna House of Fraser og Iceland Foods. Þar segir að ákvörðun um afsagnirnar hafi verið tekin í kjölfar málsóknar slitastjórnar Glitnis á hendur Jóni Ásgeiri og fólki sem honum tengist.

Rannsaka þurfi allt söluferlið á HS orku

Þingflokkur Vinstrihreyfingarinnar – græns framboðs ítrekar, í yfirlýsingu sem hann sendi frá sér í gærkvöldi, þá grundvallarstefnu sína að allar auðlindir þjóðarinnar eigi að vera sameign hennar.

Lyfjafyrirtæki þegar hætt að skrá ný lyf

Farið er að bera á því að lyfjafyrirtæki hætti við að skrá ný lyf á markað hér á landi þar sem stjórnvöld voru ekki tilbúin til að borga sambærilegt verð og fæst fyrir lyfin á hinum Norðurlöndunum, segir Jakob Falur Garðarsson, framkvæmdastjóri Frumtaka, samtaka framleiðenda frumlyfja.

Kókaínsmygl og peningaþvætti

Tveir menn og tvær konur hafa verið dæmd í Héraðsdómi Reykjavíkur fyrir stórfellt fíkniefnasmygl og peningaþvætti. Sá sem þyngstan dóm hlaut, David Erik Crunkleton, var dæmdur í átján mánaða fangelsi. Hinn karlmaðurinn var dæmdur í sex mánaða fangelsi, þar af þrjá á skilorði. Önnur konan var dæmd í tíu mánaða fangelsi en hin í fjóra mánuði á skilorði.

Mikil eldvirkni á Íslandi um þessar mundir

Hrina eldgosa í Vatnajökli sem hófst árið 1996 er í samræmi við rannsóknir sem íslenskir vísindamenn gerðu og voru birtar fyrst fyrir rúmum áratug.

Sextándi hver íbúi á Vesturlandi er í kjöri

Óvenjulega margir eru nú í framboði á Vesturlandi, en það helgast af því að í Dalabyggð er enginn listi í boði. Við slíkar aðstæður eru allir íbúar sveitarfélagsins, sem kjörgengir eru, í framboði, nema þeir sem setið hafa í sveitarstjórn og gefa ekki kost á sér.

Hreiðar og Ingólfur lausir úr gæsluvarðhaldi

Hreiðari Má Sigurðssyni og Ingólfi Helgassyni, fyrrverandi forstjórum Kaupþings, hefur verið sleppt úr gæsluvarðhaldi en báðir voru úrskurðaðir í farbann síðdegis í dag. Þetta staðfesti Ólafur Þór Hauksson, sérstakur saksóknari í samtali við Vísi í kvöld.

Skilyrði fyrir samstarfi að viðkomandi hafi horft á The Wire

„Ég bjóst við meiru. Það var sjokkerandi að heyra að það væru ekki fleiri að kjósa Besta flokkinn,“ segir Jón Gnarr sem er ótvíræður sigurvegari í skoðanakönnun sem MMR gerði fyrir Sjálfstæðisflokkinn og Stöð 2 greindi frá en þar kemur í ljós að Besti flokkurinn nær 6 fulltrúum inn í borgarstjórn fari kosningar eins og könnunin gefur til kynna.

Erfiður dagur fyrir Víglund eftir ævistarf hjá BM Vallá

Eitt stærsta iðnfyrirtæki landsins, BM Vallá, var tekið til gjaldþrotaskipta í dag. Stjórnarformaðurinn Víglundur Þorsteinsson hefur starfað við félagið í hálfa öld og sér nú á bak ævistarfinu.

Hollendingar taldir tengjast misferli með þrjú tonn af kannabisi

Þrír hollenskir karlmenn eru í haldi lögreglu vegna rannsóknar hennar á fíkniefnamáli. Þeir eru taldir tengjast haldlagningu á þremur tonnum af kannabisefnum í Hollandi.

Besti flokkurinn stærsta stjórnmálaaflið í Reykjavík

Besti flokkurinn er orðinn stærsti stjórnmálaflokkurinn í Reykjavík, ef marka má nýja könnun á fylgi flokkana. Framboðið fengi sex menn í borgarstjórn ef kosið yrði í dag.

Hollendingar handteknir á löskuðu skipi grunaðir um smygl

Þrír menn hafa verið handteknir vegna gruns um fíkniefnasmygl en þeir komu á löskuðu skipi til Seyðisfjarðar á laugardaginn. Þetta kom fram í fréttum RÚV.

Falsaður fimmþúsundkall í umferð

Lögreglunni á Vestfjörðum hefur borist kæra vegna framvísunar 5.000.- kr. peningaseðils sem reyndist falsaður. Í tilkynningu frá lögreglu segir að seðillinn hafi verið afhentur í verslun einni á Ísafirði fyrr í dag. Lögreglan á Vestfjörðum er með málið til rannsóknar.

Neyðarnefnd Icelandair glímir við öskuna frá degi til dags

Sérstök neyðarstjórn Icelandair, sem hittist þrisvar á dag, reynir að halda flugflotanum sem mest á lofti þrátt fyrir eldfjallaösku. Röskun á flugáætlun að undanförnu kostar félagið að jafnaði um fimmtíu milljónir króna á sólarhring.

Icelandair: Gert ráð fyrir að flug verði á áætlun á morgun

Flug Icelandair verður samkvæmt áætlun á morgun, nema hvað flugi til Amsterdam, Frankfurt og Parísar frá Keflavíkurflugvelli í fyrramálið hefur verið aflýst. Í tilkynningu segir að ferðir frá þessum borgum síðdegis á morgun verði samkvæmt áætlun. Flugi síðdegis í dag hefur hinsvegar verið aflýst eins og áður hefur komið fram.

Salan verður rædd í ríkisstjórn

Steingrímur J. Sigfússon fjármálaráðherra sagði í dag að salan á HS Orku til Magma Energy verði rædd í ríkisstjórn á morgun. Málið var rætt í óundirbúnum fyrirspurnartíma á Alþingi í dag og þar sagði Steingrímur ennfremur að vonir hafi verið bundnar við að lífeyrissjóðir kæmu inn í dæmið og keyptu eignarhlut Geysis Green Energy.

Þyrlan gat ekki sótt slasaða

Bílslys varð á Laxardalsheiði fyrir hádegið þegar bifreið fór út af veginum og valt. Karl og kona voru flutt á sjúkrahús í Reykjavík með sjúkrabílum. Óskað var eftir því að þyrla Landhelgisgæslunnar sækti fólkið en öskufall úr Eyjafjallajökli kom í veg fyrir það.

Iceland Express: Vél frá Gatwick í loftið klukkan sex

Vél Iceland Express fer frá London Gatwick klukkan 18:00 að staðartíma áleiðis til Keflavíkur. Áætlað er að vélin lendi um áttaleytið í kvöld að íslenskum tíma. Félagið reiknar með að flug félagsins í fyrramálið verði samkvæmt áætlun en farþegar eru minntir á að fylgjast vel með því áætlun getur breyst með stuttum fyrirvara.

Eldur í barnavagni í Breiðholti

Slökkviliðið var kallað að Vesturbergi 98 í Breiðholti nú rétt fyrir klukkan tvö en þar kom upp eldur í barnavagni í stigagangi hússins. Verið er að reykræsta stigaganginn en íbúar í húsinu gátu slökkt eldinn. Ekki þurfti því að rýma íbúðir í húsinu.

Bílslys á Laxárdalsheiði

Bílslys varð á Laxardalsheiði fyri hádegið. Lögreglan í Borgarnesi getur litlar upplýsingar gefið um slysið að svo stöddu en þó er ljóst að bíll fór útaf veginum og valt. Lögregla og sjúkralið er á staðnum og ljóst er að einn hefur slasast að minnsta kosti. Frekari upplýsingar verða gefnar síðar að sögn lögreglu.

Eldurinn slökktur í Austurbæjarskóla

Slökkvilið höfuðborgarsvæðisins hefur nú ráðið niðurlögum eldsins sem upp kom í Austurbæjarskóla rétt fyrir klukkan eitt í dag. Eldurinn var í risi hússins norðanmeginn og var skólinn rýmdur þegar í stað. Rýming gekk vel og slökkvistarfið einnig. Nú stendur yfir reykræsting í skólanum.

Eldur í Austurbæjarskóla: Skólinn rýmdur

Allt tiltækt slökkvilið var kallað út að Austurbæjarskóla þar sem upp kom eldur nú rétt fyrir eitt. Eldurinn er í risi hússins norðanmegin og hefur skólinn verið rýmdur. Að sögn lögreglu gekk vel að rýma skólann og hefur öllu skólahaldi verið aflýst það sem eftir lifir dags. Nærliggjandi götum hefur ennfremur verið lokað og berst slökkviliðið nú við eldinn.

Dúfa í óskilum

Starfsmenn Fjarðarstáls í Hafnarfirði fengu óvæntan gest í heimsókn þegar inn í fyrirtækið flaug merkt dúfa sem virðist vera húsvön. Dúfan er merkt með númeri á fæti, hvít með gráa vængi og tvær svartar rendur á hvorum væng. Að sögn starfsmanna lætur hún ekki mikið fara fyrir sér og hægt er að komast alveg upp að henni.

Íbúafundur vegna eldgossins

Þjónustumiðstöðin að Heimalandi minnir á áður auglýstan fund í kvöld klukkan 20:30 fyrir íbúa í Rangárþingi eystra á vegum sveitarfélagsins í félagsheimilinu Heimalandi. Á fundinum verður fjallað um stöðu mála vegna eldgossins í Eyjafjallajökili og úrræði rædd, að því er fram kemur í tilkynningu.

Ögmundur: Hrikaleg tíðindi

Ögmundur Jónasson, þingmaður Vinstri grænna, segir samkomulag Magma Energy og Geysir Green Energy um að Magma kaupi öll hlutabréf Geysis í HS-Orku vera hrikaleg tíðindi. Alþingi og ríkisstjórnin verði að grípa í taumanna.

Millilandaflugvellirnir gætu allir lokast

Horfur eru á að allir millilandaflugvellir hér á landi lokist í kvöld og verður það í fyrsta sinn frá því að eldgosið í Eyjafjallajökli hófst.

Gefur ekkert upp um eignalista Jóns Ásgeirs

Ekki fæst upp gefið hvort Jón Ásgeir Jóhannesson hafi skilað inn lista yfir eignir sínar til slitastjórnar Glitnis.

Kaupþingsrannsókn í eðlilegu ferli

Ólafur Þór Hauksson sérstakur saksóknari, segir mál Kaupþingsmanna í sama ferli og áður. Hann vill ekki tjá sig um hvort yfirheyrslum hafi verið fram haldið í morgun en segir að rannsókn haldi áfram.

Hættir sem framkvæmdastýra VG

Drífa Snædal lætur á næstu vikum af störfum sem framkvæmdastýra Vinstrihreyfingarinnar græns framboðs. Stjórn VG auglýsir starfið laust til umsóknar á vefsíðu flokksins. Viðkomandi þarf að geta hafið störf í júlí.

Bjarki Már: Ég er ekki skrímsli

„Ég er ekki kynferðisbrotamaður og ég er ekki þetta skrímsli sem verið er að lýsa,“ segir Bjarki Már Magnússon. Hæstiréttur Íslands staðfesti í síðustu viku átta ára fangelsisdóm yfir honum. Bjarki neyddi þáverandi sambýliskonu sína, Hrafnhildi Stefánsdóttur, meðal annars til samræðis og annarra kynferðismaka með ellefu öðrum mönnum ásamt því sem hann tók myndir og myndbönd af ofbeldinu. Bjarka er gert að greiða henni þrjár milljónir króna. Í dómsorði segir að gjörðir hans eigi sér engar hliðstæður í íslenskri réttarsögu.

Íslandshreyfingin ítrekar andstöðu við afsal auðlinda

Stjórn Íslandshreyfingarinnar, sem nú er félag innan Samfylkingarinnar, ítrekar harða andstöðu sína gegn afsali auðlinda þjóðarinnar til erlendra auðfélaga. Í tilkynningu er minnt á að hreyfingin varð fyrst framboða fyrir kosningarnar 2007 til að „vekja athygli á því í hvað stefndi ef ekki yrði strax spyrnt við fótum í sölu orkulindanna, sem þá var að hefjast.“

Tæplega tíu þúsund fleiri kjósendur á kjörskrá

Kjósendur á kjörskrá eru 9.767 fleiri nú en á kjörskrá í síðustu sveitarstjórnarkosningum eða sem svarar 4,5%. Þeir kjósendur sem nú fá að kjósa í fyrsta sinn til sveitarstjórnar sökum aldurs eru 18.772. Það eru 8,3% af heildarkjósendatölunni. Þetta kemur fram á vef Hagstofu Íslands.

Icelandair fellir niður flug

Töluverð röskun verður á flugi Icelandair í dag vegna lokunar Keflavíkurflugvallar, en flug var með eðlilegum hætti í morgun. Félagið hefur fellt niður flug til Kaupmannahafnar, London, New York, Boston og Seattle síðdegis.

Æfa forgangsakstur

Lögregluskólinn er þessa dagana með sérstakt námskeið þar sem verið er að þjálfa forgangsakstur lögreglu á höfuðborgarsvæðinu. Næstu daga geta ökumenn átt von á aukinni umferð lögreglubíla í forgangsakstri á höfuðborgarsvæðinu og því telur Umferðarstofa rétt að nota tækifærið og hvetja ökumenn til að aka ekki á vinstri akrein að óþörfu þar sem fleiri en ein akrein er í sömu átt. Lögregla, sjúkraflutningamenn og slökkvilið þurfi að geta treyst á að vinstri akreinin sé eins greið og mögulegt er því hana eigi að nota til að fara fram úr annarri umferð.

Smábátar flykkjast út til strandveiða

Smábátar hafa flykkst út til strandveiða allt frá miðnætti en veiðar eru ekki leyfðar frá föstudegi til sunnudags. Víðast hvar er gott í sjóinn og vonast sjómenn til að aflabrögð verði jafn góð og í síðustu viku. Þá eru stóru frystitogararnir byrjðir árlegar úthafskarfaveiðar á Reykjaneshrygg, en ekki hafa borist fréttir af aflabrögðum hjá þeim.