Salan verður rædd í ríkisstjórn

Steingrímur J. Sigfússon fjármálaráðherra sagði í dag að salan á HS Orku til Magma Energy verði rædd í ríkisstjórn á morgun. Málið var rætt í óundirbúnum fyrirspurnartíma á Alþingi í dag og þar sagði Steingrímur ennfremur að vonir hafi verið bundnar við að lífeyrissjóðir kæmu inn í dæmið og keyptu eignarhlut Geysis Green Energy.

Þegar í ljós kom að ekkert yrði af því óskuðu stjórnvöld eftir fresti til að skoða málið eða ganga inn í kaupin. Þeim óskum hafi hinsvegar verið hafnað en í morgun var tilkynnt um sölu Geysis Green á hlut sínum í HS Orku til Magma Energy.

Stjórnvöld voru gagnrýnd fyrir stefnuleysi í málinu af Eygló Harðardóttur þingmanni framsóknar og Þránni Bertelssyni þingmanni en Steingrímur sagði stefnuna skýra um að þjóðin njóti arðs af auðlindum sínum. Hann minnti einnig á að lengi hafi það verið stefna VG að binda sameign á þjóðarauðlindum í stjórnarskrá en að aðrir hafi komið í veg fyrir það.