Tálbeitumál fyrir dómi

Jóhannes Kr. Kristjánsson ritstjóri Kompáss og Ingi R. Ingason framleiðandi þáttarins voru kallaðir til vitnis í morgun í Héraðsdómi Reykjavíkur vegna mála tveggja manna sem gengu í gildru þáttarins í vor. Mennirnir héldu að þeir væru að fara á fund 13 ára stúlku í kynferðislegum tilgangi.

Húsleit hjá Lyfjum og heilsu

Fulltrúar frá Samkeppniseftirlitinu gerðu í morgun húsleit á skrifstofum apótekakeðjunnar Lyf og heilsa. Þetta staðfesti Lyf og heilsa.

Fjúkandi reiður út í HB Granda

Gísli S. Einarsson bæjarstjóri á Akranesi er fjúkandi reiður út í HB Granda vegna ákvörðunnar fyrirtækisins um að hætta við að flytja upp á Akranes. "Það er verulega þungt í mér hljóðið sökum þess og þeir höfðu ekki einu sinni fyrir því að tilkynna okkur um þessa ákvörðun áður en hún birtist í fjölmiðlum," segir Gísli S. Einarsson bæjarstjóri á Akranesi í samtali við Vísi.

Kjötkrókur dæmdur í skilorð

Héraðsdómur Suðurlands dæmdi í dag karlmann í þrettán mánaða skilorðsbundið fangelsi fyrir að stela hangikjötslæri úr Bónus. Maðurinn var á skilorði fyrir brotið en vegna þess að hann þykir hafa komið lífi sínu á réttan kjöl eftir töluvert langan brotaferil þótti dómara rétt að dæma manninn aftur í skilorðsbundið fangelsi.

Karl Steinar Guðnason hættir

Karl Steinar Guðnason, forstjóri Tryggingastofnunar ríkisins, lætur af störfum 1. nóvember næstkomandi vegna aldurs. Við starfi hans tekur Sigríður Lillý Baldursdóttir, framkvæmdastjóri Þróunarsviðs Tryggingastofnunar.

Fulltrúi Landsbjargar til Ghana

Gisli Rafn Ólafsson, Slysavarnafélagi Landsbjargar, er nú á leið til Ghana til þess að aðstoða stjórnvöld í að meta umfang mikilla flóða sem þar hafa verið undanfarið. Gísli og félagar hans munu skoða aðstæður á vettvangi og samhæfa viðbrögð alþjóðasamfélagsins auk þess að styðja við bakið á almannavörnum landsins.

Randver hrærður

Randver Þorláksson leikari segir að það hræri hans litla hjarta hve sterk viðbrögðin hafa verið við brotthvarfi hans úr Spaugstofunni. "Mér þykir mjög vænt um hvað þjóðinni þykir vænt um mig," segir Randver í samtali við Vísi. Sett hefur verið upp sérstök vefsíða þar sem fólk getur mótmælt uppsögn Randvers og hafa yfir 300 skráð sig þar.

Sluppu ómeiddir úr bílveltu

Tveir menn sluppu ómeiddir þegar bifreið þeirra valt á Vífilsstaðavegi um klukkan tíu í morgun. Sjónarvottar að slysinu segja að um ofsaakstur hafi verið að ræða en lögregla tjáir sig ekki um það að svo stöddu. Að sögn vaktstjóra hjá slökkviliðinu voru sjúkrabílar kallaðir á vettvang en ökumaður og farþegi reyndust ekki alvarlega slasaðir.

HB Grandi hættir við Skagann

Stjórn HB Granda hefur hætt við áform sín um að flytja upp á Akranes og reisa þar nýtt fiskiðjuver. Á heimsíðu HB Grand er sagt að þessi ákvörðun sé tekin þar sem Faxaflóahafnir hafi ekki talið sér fært að uppfylla óskir HB Granda um gerð nýrrar fiskihafnar á Akranesi. Björn Ingi Hrafnsson stjórnarformaður Faxaflóahafna segir að þverpólitísk samstaða hafi verið innan hafnarstjórnar um samstarf við HB Granda.

Bílakaup jukust í vor og sumar

Neysla almennings eykst á ný á öðrum ársfjórðungi þessa árs samkvæmt Hagtíðindum Hagstofunnar. Á fyrsta ársfjórðungi dróst neysla saman um rúmlega eitt prósent. Bílakaup jukust lítilsháttar en færri kaupa hins vegar sjónvörp, tölvur og hjólhýsi. Alls jókst landsframleiðsla um 2,5 prósent á ársfjórðunginum.

Ferðakóngurinn Andri á Írlandi

Primera Travel Group, fyrirtæki Andra Más Ingólfssonar hefur fest kaup á stærstu ferðaskrifstofu Írlands. Kaupverðið er 46,4 milljónir evra eða rúmlega fjórir milljarðar króna. Ferðaskrifstofan ber nafnið Budget Travel og samkvæmt upplýsingum á heimsíðu hennar var veltan á síðasta ári um 200 milljónir evra eða um 18 miljarðar króna.

Bolvíkingar kynna aðgerðaráætlun

Bæjarstjórn Bolungarvíkur kynnti í gærkvöldi aðgerðaráætlun til að koma í veg fyrir atvinnuleysi og fólksfækkun í bænum vegna skertra þorskveiðiheimilda á þessu fiskveiðiári.

Bílar fuku í óveðri í gærkvöldi

Tveir menn voru fluttir meiddir á sjúkrahús eftir að lítill flutningabíll fauk út af veginum við Ingólfsfjall um níuleytið í gærkvöldi. Þá fauk bíll út af þjóðveginum við bæinn Reyðará hjá Lóni skammt frá Höfn í Hornafirði. Fimm voru í bílnum og þurfti einn að leita til læknis vegna skurðar á hendi en aðrir sluppu ómeiddir.

Síldarvinnslan í Tallin

Um það bil 320 manna hópur starfsmanna Síldarvinnslunnar í Neskaupstað, og frá starfsstöðvum fyrirtækisins á Seyðisfirði, í Helguvík og á Siglufirði, er kominn til Tallin í Eistlandi. Þar stendur til að halda veglega árshátíð í Óperuhúsinu annað kvöld.

Ölvun á skólaböllum

Talsverð ölvun var á þremur skólaböllum sem haldin voru á höfuðborgarsvæðinu í gærkvöldi. Ekki kom þó til alvarlegra átaka, að sögn lögrelgu, en þó þurfti að taka fimm ungmenni úr umferð vegna ölvunar. Foreldrum þeirra var gert viðvart, sem sóttu þá á lögreglustöðina.

Slösuðust lítillega þegar bíll fauk út af veginum

Tveir menn voru fluttir lítillega meiddir á sjúkrahús eftir að lítill flutningabíll fauk út af veginum við Ingólfsfjall um níuleytið í kvöld. Talsvert hvassviðri er á þessum slóðum og eru ökumenn kvattir til að sýna sérstaka aðgát við akstur.

Stóra Lúkasarmálið týnt í kerfinu

Öll gögn í Lúkasarmálinu eru týnd að því er virðist. Hvorki lögreglan á Akureyri né lögreglan á höfuðborgarsvæðinu kannast við að málið sé á þeirra borðum. Erlendur Þór Gunnarsson, lögfræðingur Helga Rafns Brynjarssonar, sagði í samtali við Vísi í dag að lögreglan á höfuðborgarsvæðinu hefði rannsakað málið í sumar. Síðan hefði verið tekin sú ákvörðun að fela það lögreglunni á Akureyri.

Bílvelta í Lóni

Bílvelta varð við bæinn Reyðará í Lóni austan við Höfn í Hornafirði. Mikið rok hefur verið fyrir austan í allan dag og telur lögreglan að bíllinn hafi hreinlega fokið út af. Fimm voru í bílnum og þurfti einn að leita til læknis vegna skurðar á hendi en aðrir sluppu ómeiddir.

Íslenskir Bjarnabófar í gæsluvarðhaldi í Kaupmannahöfn

Tveir íslenskir karlmenn eru sakaðir um bankarán sem var framið í Nordea á Amagerbrogade í gær. Mennirnir eiga það sameiginlegt að heita Bjarni. En þeir munu deila ýmsu fleira en fornafninu á næstunni. Þeir munu nefnilega dúsa saman í fangelsi í 27 daga. Saksóknari fór fram á gæsluvarðhaldsúrskurð yfir mönnunum svo þeir gætu ekki stungið af úr landi.

Sjómenn sárir

Formaður Sjómannasambands Íslands segir ríkisstjórnina hafa gleymt sjómönnum í mótvægisaðgerðum vegna kvótaskerðingarinnar. Hann segir sjómenn sára og urgur sé í þeim.

Lúxuskvöldverður Kaupþings í Listasafni Reykjavíkur

Kaupþing býður tæplega tvö hundruð viðskiptavinum bankans í lúxuskvöldverð á Listasafni Reykjavíkur um helgina. Michelinkokkur frá einum dýrasta veitingastað Frakklands eldar og dýrasta vínið kostar allt að hundrað þúsund krónum flaskan.

Gangnamenn til byggða úr erfiðustu leitum um árabil

Gangnamenn Hrunamanna komu til byggða í dag úr einhverjum erfiðustu leitum í áratugi. Mikil bleyta eftir úrhellisrigningar veldur því að hestar og menn koma sárir og örþreyttir ofan af hálendinu.

Landsbankinn býður 200 völdum viðskiptavinum á La Scala á Ítalíu

Landsbankinn býður tvö hundruð völdum viðskiptavinum bankans ásamt mökum í ferð til Ítalíu um helgina. Farið verður á La Scala Óperuna, gist verður á fimm stjörnu lúxushóteli og vel gert við sig í mat og drykk.

Snarræði forðaði stórslysi í Kollafirði

Litlu mátti muna að fjöldi fólks slasaðist alvarlega í Kollafirði í morgun þegar rúta með fimmtíu farþega ók inn í aurskriðu við Esjurætur. Tveir farþegar meiddust lítillega.

Hydro keppir um orku til álvers á Íslandi

Norski álframleiðandinn Hydro gefur ekkert eftir í álverskapphlaupinu og vill hefja framkvæmdir sem fyrst í Þorlákshöfn, á Keilinesi eða á öðrum hentugum stað á landinu. Sendinefnd frá Hydro fundaði í gær með Landsvirkjun og Orkuveitu Reykjavíkur.

Slökkviliðið kallað að Spítalastíg

Allt tiltækt lið slökkviliðsins var kallað að Spítalastíg á sjötta tímanum í dag. Samkvæmt upplýsingum frá Jóni Viðari Matthíassyni slökkviliðsstjóra lagði mikinn reyk frá húsi þar. Því var ákveðið að senda inn tvo reykkafara. Sennilegast hafi verið einhver eldur. Síðar kom í ljós að eldurinn var ekki eins mikill og fyrst var talið.

Tveggja mánaða skilorð fyrir að reyna að keyra niður fyrrverandi konuna sína

Hæstiréttur staðfesti í dag fangelsisdóm yfir karlmanni sem sakaður var um að hafa stofnað lífi fyrrum konu sinnar í hættu. Maðurinn ók bifreið sinni að konunni sem tókst með naumindum að forða sér. Í dómnum kemur fram að karlmaðurinn hafi borið mjög þungan hug til konunnar og þykir sannað að hann hafi sett hana í háska með ófyrirleitnum hætti.

Ölvuð undir stýri með barnið í bílnum

Kona á fertugsaldri var tekin fyrir ölvunarakstur við gatnamót Reykjanesbrautar og Breiðholtsbrautar síðdegis í gær. Með konunni í bílnum var barn hennar sem er á grunnskólaaldri. Þá var rúmlega þrítugur karl tekinn fyrir ölvunarakstur í nótt en sá var stöðvaður í Skútuvogi.

Þriggja og hálfs árs fangelsi fyrir nauðgun

Hæstiréttur dæmdi í dag Americo Luis Da Silva Conçalves í þriggja og hálfs árs fangelsi fyrir að nauðga konu þann 10 september 2006 . Þá var hann dæmdur til að greiða fórnarlambinu eina milljón króna í miskabætur. Maðurinn fékk fjögurra ára fangelsi í héraði.

Fékk ekki að kveðja eiginmann sinn eftir að honum var vísað úr landi

Eiginkona rússnesks manns sem búsettur hefur verið hér á landi undanfarin tvö ár óttast um afdrif hans eftir að hann var rekinn úr landi í gær. Maðurinn, sem er frá Tjetjeníu, var sendur til baka til Rússlands og óttast kona hans að þar verði hann settur í fangelsi vegna uppruna síns. Lögreglan meinaði henni að kveðja hann á Leifsstöð í gær.

Skilja þarf betur á milli einkaleyfis- og samkeppnisþátta raforkumarkaðar

Samkeppniseftirlitsins telur að huga þurfi að aðgerðum til að virkja betur samkeppni á íslenskum raforkumarkaði. Þetta kemur fram í tilkynningu eftirlitsins í tilefni af því að í dag kom út skýrsla norrænu samkeppniseftirlitsstofnanna um raforkumarkaðinn.

Geir fundar með forseta Írlands

Geir H. Haarde, forsætisráðherra, fundaði í dag með frú Mary McAleese, forseta Írlands. Þá ræddi Geir um stöðu efnhags- og atvinnumála á Íslandi og Írlandi við Michael Martin, ráðherra iðnaðar-,viðskipta- og vinnumarkaðsmála.

Stefna að því að koma á fót alhliða brjóstameinastöð

Tveir hjúkrunarfræðingar vinna að því að koma á fót brjóstameinamiðstöð hér á landi þar sem konum sem greinast með brjóstakrabbamein og aðra sjúkdóma í brjóstum og aðstandendum þeirra verður boðið upp á alla þjónustu, allt frá greiningu til loka meðferðar.

Lítið atvinnuleysi í landinu í ágúst

Atvinnuleysi á landinu öllu mældist 0,9 prósent í nýliðnum ágústmánuði samkvæmt tölum Vinnumálastofnunar. Þetta jafngildir því að 1.476 manns hafi verið án atvinnu í mánuðinum að meðaltali. Fleiri konur voru án atvinnu en karlar í síðasta mánuði.

Býður vesturbæingum upp á heimsendingar með lyf

Apótek Vesturlands býður vesturbæingum í Reykjavík upp á heimsendingar á lyfjum í auglýsingu sem apótekið birti í Vesturbæjarblaðinu í dag. Í auglýsingunni er fullyrt að Lyf og heilsa láti vesturbæinga niðurgreiða lyf vegna samkeppni á Akranesi. Eigandi Apóteks Vesturlands segist geta boðið vesturbæingum upp á allt að 76 prósent lægra lyfjaverð.

Keppst um hver er sparneytnasti bíllinn

Nú stendur yfir kappakstur á höfuðborgarsvæðinu þar sem markmiðið er ekki hraði heldur sparneytni bíla og lágan eldsneytiskostnað. Kappaksturinn er haldinn á vegum samráðsvettvangs atvinnulífs og Verkfræðistofnunar Háskóla Íslands og Orkuveitu Reykjavíkur og taka 30 vistvænustu bifreiðar landsins þátt í honum.

Yfir 300 ökumenn teknir fyrir hraðakstur á Bústaðavegi

Alls eiga 322 ökumenn yfir höfði sér sekt vegna hraðaksturs á Bústaðavegi í gær og fyrradaga. Brot þeirra náðust á löggæslumyndavél á gatnamótum Bústaðavegar og Flugvallarvegar.

Knúði mann til að taka fé af reikningi sínum með ofbeldi

Karlmaður hefur verið ákærður fyrir bæði líkamsárás og rán fyrir að knýja annan mann með ofbeldi og hótunum um ofbeldi til þess að fara í banka og taka út fé af reikningum sínum. Ákæra á hendur manninum var þingfest í Héraðsdómi Reykjavíkur í gær.

Rektor braut klósett í reiðikasti

Rektor Menntaskólans við Hamrahlíð braut í gær klósett sem nemendur höfðu ætlað að nota við busavígslu og hellti úr skálum reiði sinnar yfir þá. Nemendur voru miður sín eftir atvikið, en þeir höfðu fengið klósettið lánað fyrir vígsluna.

Ríkisstofnunum fækkar

Ríkisstofnunum fækkaði um 50 frá árunum 1998 til 2006 samkvæmt samantekt fjármálaráðuneytisins. Fjöldi starfsmanna hjá ríkisstofnunum var 21.600 í lok síðasta árs og um þriðjungur þeirra vann hjá heilbrigðisstofnunum.

Tryggja verður að orkulindir verði í almannaeigu

Formaður iðnaðarnefndar Alþingis segir að tryggja verði að orkulindir þjóðarinnar verði í almannaeigu. Formaður Framsóknarflokksins telur hlutafélagavæðingu Orkuveitu Reykjavíkur orka tvímælis.

Ekki komið nægilega til móts við fólk í sjávarútvegi

Stjórnarandstaðan segir mótvægisaðgerðir ríkisstjórnarinnar við skerðingu þorskkvótans ekki koma nægilega til móts við sjómenn, fiskvinnslufólk og þau útgerðarfyrirtæki sem verði mest fyrir þorskskerðingunni. Sjávarútvegurinn standi jafn slyppur og snauður eftir aðgerðirnar.

Sigurjón svikinn um stöðu framkvæmdastjóra

Sigurjón Þórðarson fyrrverandi alþingismaður frjálslyndra, fær ekki stöðu framkvæmdastjóra flokksins, eins og honum hafði verið lofað, þegar hann vék sæti fyrir Kristni H. Gunnarssyni.

Lúxussjávarafurðafyrirtæki komið í þrot

Fyrirtæki sem framleitt hefur sæeyru við Eyjafjörð er gjaldþrota. Öllum starfsmönnum hefur verið sagt upp.

Erlendir ferðamenn eyða þriðjungi meira en í fyrra

Gjaldeyristekjur af ferðamönnum jukust verulega á öðrum fjórðungi ársins miðað við sama tímabil í fyrra eftir því sem segir í frétt frá Ferðamálastofu. Þar er vitnað í tölur frá Seðlabankanum sem sýni að neysla ferðamanna hafi aukist um nærri þriðjung, úr ellefu milljörðum króna í rúma 14 á tímabilinu.