Býður vesturbæingum upp á heimsendingar með lyf

Apótek Vesturlands býður vesturbæingum í Reykjavík upp á heimsendingar á lyfjum í auglýsingu sem apótekið birti í Vesturbæjarblaðinu í dag. Í auglýsingunni er fullyrt að Lyf og heilsa láti vesturbæinga niðurgreiða lyf vegna samkeppni á Akranesi. Eigandi Apóteks Vesturlands segist geta boðið vesturbæingum upp á allt að 76 prósent lægra lyfjaverð.

„Ég er fyrst og fremst með auglýsingunni að vekja athygli á þeim viðskiptaháttum sem Lyf og heilsa stundar," sagði Ólafur Adolfsson, lyfjafræðingur og eigandi Apóteks Vesturlands, í samtali við Vísi. „Hins vegar munum við að sjálfsögðu standa við þær yfirlýsingar sem koma fram í auglýsingunni og senda lyfin heim til þeirra sem panta."

Í auglýsingunni, sem er með fyrirsögninni "Ert þú að niðurgreiða lyf fyrir Skagamenn?", er fullyrt að hjá Lyf og heilsu í vesturbæ Reykjavíkur sé lyfjaverða allt að 76 hærra en í apóteki sömu keðju á Akranesi.

Tekin eru sex verðdæmi í auglýsingunni. Samkvæmt þeim dæmum kostar 500 mg. pakkning af paratabs töflum 219 krónur í verslun Lyf og heilsu á Akranesi en 334 krónur hjá Lyf og heilsu í vesturbæ Reykjavíkur. Er þetta verðmismunur upp á 52,5 prósent. Þá er tekið verðdæmi á lyfseðilsskyldum Diovan Comp töflum, 98 stykkjum. Hjá Lyf og heilsu á Akranesi kostar þær 1.924 krónur en í vesturbæ 3.400 krónur og munar 76,7 prósentum í verði milli Apóteka.

Ólafur segir ljóst að Lyf og heilsa hafi lækkað verð á Akranesi til að bola Apóteki Vesturlands útaf markaði. Að hans mati er um kolólöglega viðskiptahætti að ræða. „Það er lítil von fyrir sprotafyrirtæki á markaðinum ef markaðsráðandi fyrirtæki beita þessum bellibrögðum.Ég vona að almenningsálitið þvingi þetta fyrirtæki til að taka upp eðlilega viðskiptahætti."

Ekki náðist í forsvarsmenn Lyf og heilsu við gerð þessarar fréttar.