Bílakaup jukust í vor og sumar

Neysla almennings eykst á ný á öðrum ársfjórðungi þessa árs samkvæmt Hagtíðindum Hagstofunnar. Á fyrsta ársfjórðungi dróst neysla saman um rúmlega eitt prósent. Bílakaup jukust lítilsháttar en færri kaupa hins vegar sjónvörp, tölvur og hjólhýsi. Alls jókst landsframleiðsla um 2,5 prósent á ársfjórðunginum.

Samkvæmt Hagtíðindum Hagstofunnar er talið að landsframleiðsla hafi aukist um 2,5 prósent að raungildi frá byrjun aprílmánaðar til loka júnímánaðar. Á sama tíma jókst einkaneysla um 3,9 prósent og samneysla um 2,6 prósent. Fjárfesting dróst saman um rúmlega 8 prósent. Útflutningur minnkar um rúmlega 3 prósent og innflutningur um tæplega 7 prósent.

Einkaneysla er talin hafa vaxið um 3,9 prósent á tímabilinu og hefur orðið viðsnúningur frá fyrsta ársfjórðungi þegar neyslan dróst saman um rúmlega 1 prósent. Bílakaup jukust lítilsháttar eftir samdrátt síðustu ársfjórðunga og aðrir liðir einkaneyslunnar jukust einnig fyrir utan liðinn tómstundir og menning. Undir þann lið falla meðal annars kaup á sjónvörpum, tölvum og hjólhýsum.