HB Grandi hættir við Skagann

Stjórn HB Granda hefur hætt við áform sín um að flytja upp á Akranes og reisa þar nýtt fiskiðjuver. Á heimsíðu HB Grand er sagt að þessi ákvörðun sé tekin þar sem Faxaflóahafnir hafi ekki talið sér fært að uppfylla óskir HB Granda um gerð nýrrar fiskihafnar á Akranesi. Björn Ingi Hrafnsson stjórnarformaður Faxaflóahafna segir að þverpólitísk samstaða hafi verið innan hafnarstjórnar um samstarf við HB Granda.

"Við gerum HB Granda hinsvegar grein fyrir því að sá tímarammi sem þeir settu sér væri óraunhæfur. Það er ekki hægt að byggja nýja fiskihöfn fyrir árið 2009 eins og þeir óskuðu," segir Björn Ingi. "Það á eftir að hanna og skipuleggja svæðið og setja það síðan í umhverfismat og þessi vinna tekur lengri tíma en þau tvö ár sem HB Grandi var með hugmyndir um."'

Björn Ingi segir að það hafi verið alger samstaða innan hafnarstjórnar um að vinna að gerð nýrrar fiskihafnar á Akranesi í samvinnu við HB Granda. "Bæði þverpólitísk samstaða og meðal allra þeirra sveitarstjórnarmanna sem að málinu koma," segir Björn Ingi.