Ferðakóngurinn Andri á Írlandi

Primera Travel Group, fyrirtæki Andra Más Ingólfssonar hefur fest kaup á stærstu ferðaskrifstofu Írlands. Kaupverðið er 46,4 milljónir evra eða rúmlega fjórir milljarðar króna. Ferðaskrifstofan ber nafnið Budget Travel og samkvæmt upplýsingum á heimsíðu hennar var veltan á síðasta ári um 200 milljónir evra eða um 18 miljarðar króna.

Greint er frá kaupunum á viðskiptasíðunni thisismoney.co.uk en Budget Travel var áður í eigu Group Irish samsteypunnar. Sagt er að kaupin séu háð samþykki samkeppniseftirlits Evrópusambandsins.

"Budget Travel er öflugt fyrirtæki sem hefur þegar brugðist af krafti og útsjónarsemi við þeim breytingum sem orðið hafa á alþjóðlegum ferðamarkaði," segir Andri Már um kaupin. "Budget Travel fellur mjög vel að starfsemi Primera Travel Group og hefur afar sterka stöðu á vinsælustu áfangastöðum ferðamanna í Evrópu. Kaupin munu styrkja stöðu Primera Group til áframhaldandi uppbyggingar á áfangastöðum sínum."

Budget Travel var stofnað 1975 í kjallara einum í Dublin. Síðan þá hefur keðjan vaxið og dafnað og er nú sem fyrr segir sú stærsta á Írlandi með 35% af ferðamarkaðinum þar í landi.