Skilja þarf betur á milli einkaleyfis- og samkeppnisþátta raforkumarkaðar

Samkeppniseftirlitsins telur að huga þurfi að aðgerðum til að virkja betur samkeppni á íslenskum raforkumarkaði. Þetta kemur fram í tilkynningu eftirlitsins í tilefni af því að í dag kom út skýrsla norrænu samkeppniseftirlitsstofnanna um raforkumarkaðinn.

Meðal þess sem Samkeppniseftirlitið leggur til er að stjórnvöld og orkufyrirtæki ræði um að skilja betur milli einkaleyfis- og samkeppnisþátta raforkumarkaðarins, þ.e. flutnings og dreifingar annars vegar og framleiðslu og sölu hins vegar.

Telur eftirlitið best að skilja þessa þætti alveg að en að lágmarki að skilja þessa starfsemi að í sjálfstæðum félögum. Þá telur eftirlitið að auka þurfi nákvæmni orkumælinga, meðal annars með orkumælum sem senda frá sér upplýsingar um orkunotkun reglulega.

„Slíkar orkumælingar ættu að leiða til meiri fjölbreytni í verði á raforku eftir aðstæðum hverju sinni, auka verðvitund neytenda og samkeppni smásala, ásamt því að bæta nýtingu raforku," segir í tilkynningu Samkeppniseftirlitsins.

Færri raforkusmásalar á Íslandi en í hinum norrænu ríkjunum

 

Enn fremur er bent á að hinn íslenski raforkumarkaður sé að ýmsu leyti frábrugðinn öðrum norrænum raforkumörkuðum. Mun meira hafi verið fjárfest í orkuverum á Íslandi á umliðnum árum en annars staðar á Norðurlöndum og þá eru umtalsvert færri raforkusmásalar á Íslandi en annars staðar á Norðurlöndunum auk þess sem hlutdeild stærsta framleiðandans í framleiðslu á rafmagni er mjög há.

 

Þá er bent á í tilkynningu Samkeppniseftirlitsins að mesta vandamál smásölu á raforkumarkaði sé verðvitund neytenda. Fáir hafi skipt um raforkusmásala innan sumra norrænu ríkjanna, sér í lagi á Íslandi. Til þess að auka verðvitund neytanda myndu raforkumælar sem senda reglulega frá sér upplýsingar um notkun vera æskilegir að því gefnu hægt sé að koma þeim upp án óhóflegs kostnaðar. Neytendur gætu þá lagað sig betur að raforkuverðum sem myndi stuðla að hagstæðari kjörum þeirra og betri nýtingu raforku.

Skýrslu um norræna raforkumarkaðinn má sjá hér að neðan.