Keppst um hver er sparneytnasti bíllinn

Nú stendur yfir kappakstur á höfuðborgarsvæðinu þar sem markmiðið er hraði heldur sparneytni bíla og lágan eldsneytiskostnað. Kappaksturinn er haldinn á vegum samráðsvettvangs atvinnulífsins og Verkfræðistofnunar Háskóla Íslands og Orkuveitu Reykjavíkur og taka 30 vistvænustu bifreiðar landsins þátt í honum.

Þetta er í annað sinn sem keppnin er haldin en hún fer þannig fram að keyrður verður hringur á höfuðborgarsvæðinu í almennri umferð og síðan athugað hvað bílarnir nota mikla orku.

Bílunum verður skipt í flokka eftir stærð. Keppt verður á þremur sviðum: minnsta orkunotkun, minnsti koltvísýringsútblástur og ódýrasti hringurinn þar sem bara er tekið mið af því hve mikla orku bílinn notar og hve mikið það orkuform kostar fyrir þennan ákveðna hring. Verkfræðinemar við Háskóla Íslands verða við stýri í öllum bílum.

Fyrstu bílar voru ræstir á hádegi á á eldsneytisstöð Atlantsolíu við Húsgagnahöllina og er reiknað er með að keppninni ljúki um klukkan hálfsex.

Eftir því sem segir í tilkynningu frá Orkuveitunni er markmið keppninnar fyrst og fremst að vekja athygli á mengun frá ökutækjum ásamt orkueyðslu og beinum orkukostnaði ökutækja. Jafnframt er tilgangurinn að vekja almenning til meðvitundar um þá valkosti sem standa til boða og hvaða lausnir koma til greina bæði í dag og á næstu árum.