Gangnamenn til byggða úr erfiðustu leitum um árabil

Gangnamenn Hrunamanna komu til byggða í dag úr einhverjum erfiðustu leitum í áratugi. Mikil bleyta eftir úrhellisrigningar veldur því að hestar og menn koma sárir og örþreyttir ofan af hálendinu.

37 gangnamenn Hrunamanna eru búnir að vera á fjöllum í heila viku og fóru lengst upp í Hofsjökul og Kerlingarfjöll að sækja fé. Nú síðdegis birtust þeir með fjárreksturinn í Kirkjuskarði, skammt norðan Flúða, en safnið telur á fjórða þúsund fjár.

Steinar Halldórsson, fjallkóngur Hrunamanna, hefur verið í leitum allt frá árinu 1973 og hann segir þessar þær erfiðustu sem hann muni eftir. Svo mikið vatn hafi verið eftir rigningar að undanförnu að hrossin hafi sokkið ofan í rennblauta mela. Hestarnir séu sárir og þreyttir eftir.

Stór hópur fólks beið þess með eftirvæntingu að sjá leitarmenn birtast með safnið og margir slógust í för með þeim síðasta spölinn.

Hrunaréttir verða svo haldnar á morgun frá klukkan tíu til tólf í fyrramálið.