Ásta Ragnheiður náði áttunda sætinu

Helgi Hjörvar og Sigríður Ingibjörg Ingadóttir skiptust á sætum þegar búið var að telja öll atkvæði hjá Samfylkingunni í Reykjavík. Helgi Hjörvar situr því í þriðja sæti listans en Sigríður í því fjórða. Þá færðist Ásta Ragnheiður Jóhannesdóttir upp í 8. sæti en Anna Pála Sverrisdóttir færðist niður í það 10. Mörður Árnason vermir svo 9. sætið. Alls greiddu 3543 atkvæði en 7743 voru á kjörskrá og var kjörsókn því 45,8%.

Búið að telja 78% atkvæða í Reykjavík

Engar breytingar eru á röðun efstu tólf frambjóðenda Sjálfstæðisflokksins í Reykjavík þegar að búið er að telja 6182 atkvæði af alls 7871 í prófkjörinu, eða um 78% atkvæða.

Árni Páll sigraði í Kraganum - Lúðvík 57 atkvæðum frá 1. sætinu

Árni Páll Árnason sigraði í prófkjöri Samfylkingarinnar í Suðvesturkjördæmi. Talningu er lokið og munaði 57 atkvæðum á honum og Lúðvíki Geirssyni, bæjarstjóra í Hafnarfirði, sem einnig sóttist eftir fyrsta sætinu. Þórunn Sveinbjarnardóttir, fyrrum umhverfisráðherra, hafnaði í fjórða sæti.

Ragnheiður Elín leiðir enn - Árni kominn í annað sæti

Ragnheiður Elín Árnadóttir leiðir enn í prófkjöri Sjálfstæðisflokksins á Suðurlandi þegar 3200 atkvæði af um 4000 hafa verið talin. Árni Johnsen er nú í öðru sæti og Unnur Brá Konráðsdóttir í því þriðja. Íris Róbertsdóttir er í því fjórða og Kjartan Ólafsson í fimmta sæti.

Illugi sigraði

Illugi hreppti efsta sætið í prófkjöri Sjálfstæðisflokksins í Reykjavík, en lokatölur liggja fyrir.

Guðfríður Lilja leiðir VG í Suðvesturkjördæmi

Guðfríður Lilja Grétarsdóttir hreppti fyrsta sætið í forvali Vinstri hreyfingarinnar græns framboðs í Suðvesturkjördæmi í dag. Í öðru sæti varð svo Ögmundur Jónasson heilbrigðisráðherra.

Varað við óveðri á Hellisheiði

Vegagerðin varar vegfarendur við óveðri á Hellisheiði. Hálka og éljagangur er í Þrengslum og hálkublettir á Sandskeiði og mörgum öðrum leiðum á Suðurlandi.

Tækifæri til að gera landinu gagn

,,Ég hef fengið tækifæri til að gera flokknum og landinu mínu gagn," segir Illugi Gunnarsson sem hefur örugga forystu í 1. sætið í prófkjöri Sjálfstæðisflokksins í Reykjavík. ,,Maður gleðst auðvitað þegar vel gengur."

Pínulítið hissa

,,Ég er pínulítið hissa en afskaplega þakklát og ánægð með þann stuðning sem ég hef fengið," segir Sigríður Ingibjörg Ingadóttir hagfræðingur, en hún er í 3. sæti í prófkjöri Samfylkingarinnar í Reykjavík þegar rúmlega 1300 atkvæði eru ótalin.

Tölur væntanlega úr Suðurkjördæmi upp úr miðnætti

Tölur eru væntanlegar úr Suðurkjördæmi upp úr miðnætti. Áður hafði verið gert ráð fyrir að talning þyrfti að frestast vegna veðurs og að tölur yrðu ekki kynntar fyrr en á morgun en það rofaði til stutta stund í dag og hægt var að skjótast með atkvæði frá Vestmannaeyjum. Á miðnætti verða því kynntar fyrstu tölur og heldur talning áfram fram á nótt, þar til úrslit liggja fyrir.

Óbreytt staða í Suðvesturkjördæmi

Nýjar tölur eru komnar úr Kraganum og er Bjarni Benediktsson sem fyrr efstur og Þorgerður Katrín í öðru sæti. Ragnheiður Ríkharðsdóttir heldur þriðja sætinu, Jón Gunnarsson því fjórða, Óli Björn Kárason fimmta og Ármann Kr. Ólafsson er í sjötta sætinu. Nokkur spenna er þó um úrslitin því ekki munar miklu á frambjóðendum í þriðja til sjötta sæti.

Erla og Sigríður skiptast á sætum í Reykjavík

Nú hafa verið talin 5210 atkvæði í prófkjöri sjálfstæðismanna í Reykjavík og hefur Illugi Gunnarsson örugga forystu í 1. sætið, með alls 3076 atkvæði.

Erfitt að fá svör hjá stjórn HB Granda

Fréttastofa reyndi árangurslaust í dag að fá útskýringar hjá stjórn HB Granda á ákvörðun hennar um að leggja til við aðalfund félagsins að eigendum verði greiddar um 150 milljónir króna í arðgreiðslu.

Óbreytt staða í Reykjavík - Illugi með örugga forystu

Nú hafa verið talin 4732 atkvæði í prófkjöri sjálfstæðismanna í Reykjavík og hefur Illugi Gunnarsson örugga forystu í 1. sætið, með alls 2814 atkvæði. Lítil breyting er á röðun frambjóðenda fyrir neðan. Guðlaugur Þór Þórðarson er annar og Pétur Blöndal er í þriðja sæti.

Frambjóðendur eyða í auglýsingar

Frambjóðendur í prófkjörum Sjálfstæðisflokks eyddu mörg hundruð þúsund krónum í blaðaauglýsingar síðustu tvo dagana fyrir kosningar. Formaður yfirkjörstjórnar Sjálfstæðisflokks í Reykjavík segir þó minna auglýst nú en áður.

Enginn með allar tölur réttar

Enginn var með allar tölur réttar í lottóinu í kvöld og verður vinningurinn því þrefaldur í næstu viku.

Bjarni áfram efstur - Ragnheiður færist upp

Bjarni Benediktsson er enn í fyrsta sæti í prófkjöri Sjálfstæðisflokknum í Suðvesturkjördæmi. Ragnheiður Ríkharðsdóttir er komin í þriðja sætið þegar búið er að telja um 1.100 atkvæði en hún var í sjötta sæti í fyrstu talningu.

Niðurtalning til stríðs í Asíu

Japanar segjast reiðubúnir að skjóta niður langdræga eldflaug sem Norður-Kórea segist ætla að skjóta út á Kyrrahafið.

Aðstandendur fagna ákvörðun ríkissaksóknara

Ríkissaksóknari vill að lögregla taki að nýju fyrir rannsókn á láti tveggja ungra manna sem fundust látnir í bíl við Daníelsslipp fyrir 24 árum. Aðstandendum þeirra var sagt að mennirnir hefðu framið sjálfsvíg en við þá skýringu hafa þeir aldrei sætt sig við. Þeir fagna ákvörðun ríkissaksóknara.

Ísland sagt eitt af fimm hættulegustu löndum heims

Það eru að hefjast vorfrí í bandarískum skólum. Því fagna nemendur með því að flykkjast milljónum saman til annarra landa og djúsa þar og djamma eins og það sé að koma heimsendir.

Rýmingu aflétt í Bolungarvík

Veðurstofan í samráði við Kristínu Völundardóttur, lögreglustjórann á Vestfjörðum, hefur afturkallað hættustig á reit 4 í Bolungarvík. Íbúum húsa á reitnum er heimilt að snúa heim og þá er umferð um reitinn heimil. Áfram er óvissustig á norðanverðum Vestfjörðum, að minnsta kosti til morguns.

Bjarni efstur í Kraganum - Rósa meðal efstu manna

Bjarni Benediktsson er í efsta sæti í prófkjöri Sjálfstæðismanna í Suðvesturkjördæmi en þar er búið að telja 200 atkvæði. Þorgerður Katrín Gunnarsdóttir, varaformaður Sjálfstæðisflokksins, er í öðru sæti. Þar á eftir koma Jón Gunnarsson, Ármann Kr. Ólafsson og Rósa Guðbjartsdóttir. Ragnheiður Ríkharðsdóttir, alþingismaður, er í sjötta sæti en flokkurinn fékk sex þingmenn í kjördæminu í síðustu kosningum.

Ásta Ragnheiður kemst ekki á blað - Sigríður í 3. sæti

Sigríður Ingibjörg Ingadóttir er þriðja sæti í prófkjöri Samfylkingarinnar í Reykjavík þegar talinn hafa verið 2363 atkvæði. Ásta Ragnheiður Jóhannesdóttir félagsmálaráðherra, Mörður Árnason varaþingmaður og Jón Baldvin Hannibalsson eru ekki meðal átta efstu. Röð efstu manna hefur ekki breyst frá því að fyrstu tölur voru birtar.

Illugi leiðir í Reykjavík

Illugi Gunnarsson hefur hlotið flest atkvæði í prófkjöri Sjálfstæðisflokksins í Reykjavík þegar rúmlega 3852 atkvæði hafa verið talinn af 7871. Guðlaugur Þór Þórðarson er annar og Pétur Blöndal er í þriðja sæti. Frá því að fyrstu tölur voru birtar hafa Sigríður Andersen og Erla Ósk Ásgeirsdóttir hafa sæta skipti.

Guðlaugur sækist ekki eftir formennsku

Guðlaugur Þór Þórðarsson ætlar ekki að gefa kost á sér sem formaður á landsfundi Sjálfstæðisflokksins sem fram fer dagana 26. til 29. mars í Laugardalshöll. Hann hefur um hefur alllangt skeið verið orðaður við formannsframboð.

Kveikt í útiklósettum í Kópavogi

Slökkviliði höfuðborgarsvæðisins barst tilkynning rétt eftir klukkan fjögur í dag um eld á íþróttasvæðinu í Fífunni í Kópavogi. Í ljós kom að kveikt hafði verið í nokkrum útiklósettum sem stóðu skammt hjá íþróttahúsinu Smáranum. Skamman tíma tók að slökkva í klósettunum

Lokað fyrir umferð um Kísilveg

Kísilvegur, milli Mývatnssveitar og Langavatns, er lokaður vegna ófærðar. Nokkuð hefur borið á að fólk hefur verið að festa bifreiðar sínar þarna en það er hér með áréttað að Kísilvegurinn er lokaður vegna ófærðar, að fram kemur í tilkynningu frá lögreglunni á Húsavík.

60 kílómetra löng olíubrák í Ástralíu

Talið er að rúmlega 300 tonn af olíu hafi farið í sjóinn skammt undan strönd Queenslandfylkis í norðaustur Ástralíu þegar gat kom á olíutank flutningaskips á miðvikudaginn. Strandlengjan í Queensland er þakin olíubrák á 60 kílómetra löngu svæði og hafa yfirvöld lýst yfir neyðarástandi.

Framboðslisti Samfylkingarinnar í NA samþykktur

Samfylkingarfólk í Norðausturkjördæmi kom saman á kjördæmaþingi í Brekkuskóla á Akureyri í dag og samþykkti framboðslista flokksins vegna þingkosninganna 25. apríl. Frambjóðendur í efstu sætum voru valdir í prófkjöri sem fór fram í seinustu viku.

Gas gas - fréttamynd ársins

Ólafur Ragnar Grímsson, forseti Íslands, opnaði í dag árlega ljósmyndasýningu Blaðaljómyndarafélags Íslands í Gerðarsafni í Kópavogi. Veitt voru verðlaun fyrir bestu fréttaljósmyndir ársins í sjö flokkum.

Talningu í Suðurkjördæmi frestað

Ákveðið hefur verið að fresta talningu atkvæða í prófkjöri Sjálfstæðisflokksins í Suðurkjördæmi þar sem útséð er með að ekki verði hægt að koma atkvæðum frá Vestmannaeyjum til Selfoss í kvöld sökum ófærðar í lofti og á sjó. Frá þessu er greint á fréttavefnum Sunnlendingur.is.

Eva Joly: Bankaleynd íslensku bankanna fáránleg

Eva Joly sem dómsmálaráðherra fékk til að vera ráðgjafi við rannsókn á bankahruninu sagði í viðtali í norska sjónvarpinu í gær að það væri fáránlegt að bankaleynd hvíli ennþá yfir íslensku bönkunum.

Kosið í bankaráð Seðlabankans eftir helgi

Alþingi kýs nýtt bankaráð Seðlabanka Íslands á þingfundi eftir helgi. Sjö aðalmenn og jafnmargir varamenn verða kjörnir á mánudaginn til að sitja í ráðinu fram af þeim tíma og nýtt þing kemur saman eftir þingkosningarnar 25. apríl. Kosning þeirra byggir á nýjum lögum um Seðlabankann.

Samsæri arabaleiðtoga og Vesturlanda

Osama bin Laden, leiðtogi Al Kaída hryðjuverkasamtakanna, sakar forystmenn hófsamara araba um samsæri og segir þá vinna með Vesturlöndum gegn hagsmunum annarra araba. Hljóðupptaka sem sögð er með bin Laden var birt á Al Jazeera sjónvarpsstöðinni í dag. Hún er talin hafa verið gerð í þessum mánuði.

Guðjón endurkjörinn - Magnús fékk 15 atkvæði

Guðjón Arnar Kristjánsson var endurkjörinn sem formaður Frjálslynda flokksins á landsþingi flokksins sem fer fram í Stykkishólmi í dag. Mótframbjóðandi hans og fráfarandi varaformaður flokksins, Magnús Þór Hafsteinsson, hlaut 15 atkvæði en Guðjón fékk 83 atkvæði. Einn seðill var ógildur.

Lífeyrissjóðum verði heimilt að eiga og reka íbúðarhúsnæði

Fimm þingmenn Samfylkingarinnar ætla að leggja fram á Alþingi frumvarp um breytingu á lögum um skyldutryggingu lífeyrisréttinda og starfsemi lífeyrissjóða. Helgi Hjövar, fyrsti flutningsmaður frumvarpsins, segir að með breytingunum sem lagðar eru til í frumvarpinu verði lífeyrissjóðum heimilað að eiga og reka íbúðarhúsnæði.

Mannslát í Slippnum fyrir 24 árum skoðað á nýjan leik

Valtýr Sigurðsson, ríkissaksóknari, hefur falið lögreglu að rannsaka betur einstaka þætti í láti Einars Þórs Agnarssonar og Sturlu Steinssonar sem fundust látnir í bíl við Daníelsslipp 1. mars 1985. Tvívegis var fjallað um mál þeirra í fréttaskýringaþættinum Kompási á seinata ári. Haft er eftir Valtý í Morgunblaðinu í dag að ný gögn kalli á nánari skoðun.

Eldur kom upp í Heilbrigðistofnun Vestmannaeyja

Allt tiltækt slökkvilið Vestmannaeyja var kallað að Heilbrigðisstofnun Vestmannaeyja laust eftir klukkan tólf í dag eftir að slökkviliðinu barst tilkynning um eldur væri laus í byggingunni. Í ljós kom að spennir hafði sprungið í ljósi á þriðju hæð. Lykt barst um húsið en enginn eldur var laus og ekkert tjón varð.

Arnbjörg slapp með skrekkinn í bílslysi

Þingflokksformaður sjálfstæðisflokksins slapp með skrekkinn þegar hún lenti í bílslysi á brúnni yfir Jökulsá á fjöllum í gær. Mikil hálka var á brúnni og lenti bíll hennar á öðrum sem kom úr gagnstæðri átt. Báðir bílarnir eru ónýtir en farþegarnir sluppu ómeiddir að mestu. Slæmar aðstæður voru til ferðalaga um land allt og voru björgunarsveitir kallaðar í fjölmörg verkefni.

Sigmundur Davíð: AGS blandar sér í íslensk stjórnmál

Framsóknarmenn undrast áfellisdóm formanns sendinefndar Alþjóðgjaldeyrissjóðsins yfir hugmyndum þeirra um 20 prósent niðurfellingu skulda. Formaður framsóknarflokksins sakar stjórnvöld um að beita sér í málinu.

Gunnar Bragi: Sterkur listi

Gunnar Bragi Sveinsson, sigurvegarinn í póstkosningu Framsóknarflokksins í Norðvesturkjördæmi, er afar ánægður með niðurstöðuna í kosningunni. Hann segir að framsóknarmenn hafi stillt upp sterkum lista.

Samkomulag á milli Fatah og Hamas ekki í augsýn

Stríðandi fylkingum palestínumanna hefur ekki tekist að finna grundvöll fyrir sáttum. Fulltrúar Fatah og Hamas samtakanna hafa undanfarna daga setið sáttafundi í Kairó með egypskum milligöngumönnum. Ætlunin er að reyna að sætta sjónarmið þannig að hægt verði að stofna sjálfstætt ríki palestínumanna á Vesturbakkanum og Gaza ströndinni.

Stútur endaði í Kópavogslæk

Nóttin var heldur róleg hjá lögreglunni á höfuðborgarsvæðinu og lítið af fólki í miðbænum. Rétt eftir klukkan fimm í morgun barst lögreglu tilkynning um bifreið sem lent hafði út af Hafnarfjarðarvegi og í Kópavogslæk. Ökumaður mun ekki hafa slasast en hann er grunaður um ölvun.

Enn snjóflóðahætta í Bolungarvík

Veðurstofan ákvað samráði við lögreglustjórann á Vestfjörðum að lýsa yfir hættustigi á reit 4 í Bolungarvík seinnipartinn í gær. Sú rýming heldur sér þangað til annað verður ákveðið, að sögn lögreglunnar á Vestfjörðum.

Úrslit ráðast í fjölmörgum prófkjörum

Landslagið fyrir komandi Alþingiskosningar mun skýrast um helgina en þá fara fram átta prófkjör í fjórum kjördæmum. Úrslit í prófkjörum sjálfstæðisflokks í Reykjavík, Suðurkjördæmi og Suðvesturkjördæmi ættu að liggja fyrir í kvöld. Tveir vilja fyrsta sætið í Reykjavík, Illugi Gunnarsson og Guðlaugur Þór Þórðarson.