Veikur blettur á bönkunum hve þeir reiða sig á erlent lánsfé

Það er veikur blettur á íslenskum bönkum hve mjög þeir reiða sig á erlent lánsfé og hversu ónenjulega náin og óheilbrigð eignatengsl fjárfesta og fyrirtækja eru hér á landi, segir meðal annars í skýrslu greiningarfyrirtækjanna Barclays og Capital og Credit Sights, sem Morgunblaðið greinir frá.

Saknað eftir að brú hrundi í flóðum í Noregi

Að minnsta kosti einnar manneskju er saknað eftir að bíll hafnaði úti í á þegar brú yfir hana hrundi í miklum vatnavöxtum í Syðri-Þrændarlögum í Noregi í gærkvöld. Óvíst er hversu margir voru í bílnum en leit að farþegum stóð yfir fram á nótt og hófst aftur í morgun.

Íranar hóta að svara fyrir sig

Ef vestræn ríki beita Írana hörðu verður þeim svarað í sömu mynt. Þetta sagði talsmaður utanríkisráðuneytis landsins í gær. Eina leiðin til að ná samkomulagi um kjarnorkuþróun Írana væri að setjast að fundarborðinu.

Bandaríkjamenn of háðir olíuríkjum

Bandaríkjamenn eru of háðir olíuríkjum þar sem stjórnarfar er bágborið. Þetta var meðal þess sem kom fram í stefnuræðu George Bush Bandaríkjaforseta í gær. Hann sagðist ætla að berjast fyrir því að meiri fjármunum yrði veitt í þróun tækni sem drægi úr þörf Bandaríkjanna fyrir olíu.

Veiðistofn loðnu ekki hruninn

Hafrannsóknastofnun náði í gær að mæla yfir 400 þúsund tonn af loðnu hér við land, en það er talið nægilegt til að hrygna og halda stofninum við. Það er því ljóst að veiðistofninn í ár, sem ekkert hefur spurst til í tvö ár, er ekki hruninn.

Sala á norrænum matvælum í Miðausturlöndum nær engin

Sala á norrænum matvælum í Miðausturlöndum er nær engin orðin eftir deiluna um skopmyndir Jótlandspóstsins af Múhammeð spámanni. Dansk-sænski matvælarisinn Arla Foods hefur þegar þurft að segja upp eitt hundrað manns í Miðausturlöndum vegna dvínandi eftirspurnar.

Lögðu á ráðin um stjórn fyrir kosningar

Þorsteinn Pálsson og Jón Baldvin Hannibalsson lögðu grunninn að samstjórn Sjálfstæðisflokks og Alþýðuflokks með samningum nokkuð fyrir kosningar 1991 segir Össur Skarphéðinsson í pistli á heimasíðu sinni.

Styttist í prófkjör Samfylkingarinnar í Kópavogi

Prófkjör Samfylkingarinnar í Kópavogi fyrir komandi sveitastjórnarkosningar fer fram á laugardaginn kemur. Oddviti flokksins í bæjarstjórn Kópavogs sækjist eftir fjórða sætinu en Samfylkingin hefur nú þrjú sæti í bæjarstjórn.

Segist virða ákvörðun Valgerðar

Ný leiðtogi Vinstri-grænna á Akureyri segist virða þá ákvörðun Valgerðar Bjarnadóttur að taka ekki annað sætið á listanum. Hann boðar byltingu og neitar að hafa keypt fylgi með kjötbollum.

Ekkja Martins Luther King lést í dag

Bandaríski mannréttindafrömuðurinn Coretta Scott King lést í dag, 78 ára að aldri. Hún var ekkja blökkumannaleiðtogans Martins Luthers Kings, en eftir að hann var myrtur árið 1968 valdist hún sjálf í forystusveit þeirra sem börðust fyrir borgaralegum réttindum blökkumanna í Bandaríkjunum.

Frumvarp um reykingabann lagt fyrir á Alþingi í dag

Reykingar skulu með öllu bannaðar á veitinga- og skemmtistöðum á Íslandi frá og með 1. júní 2007 ef frumvarp sem heilbrigðisráðherra mælti fyrir í dag nær fram að ganga. Ekki eru allir þingmenn á eitt sáttir við frumvarpið og virðist afstaða til þess ganga þvert á pólitískar línur. Forræðishyggja segir Björgvin Sigurðsson þingmaður Samfylkingarinnar.

Samherji hefur tapað meira en milljarði á fiskeldi

Samherji hefur tapað meira en milljarði á fiskeldi innanlands. Aðstæður eru erfiðar en forstjóri Samherja segir að það kunni að reyna á skilning stjórnmálamanna hvort greinin lifi.

Flóð valda miklu tjóni í Noregi

Hundruð manna hafa yfirgefið heimili sín í Þrándalögum í Noregi vegna mikilla flóða. Mörg hús hafa horfið í vatnsflauminn, þar af eitt sem flaut 700 metra út á haf, niður ólgandi fljót sem áður var vart meira en lækur. Vatnið hefur rifið niður brýr og vegir hafa skolast burt. Óvenjuhlýtt er í Mið-Noregi, þannig að snjór hefur bráðnað og úrhellisrigningar hafa bætt um betur. Engar fréttir hafa borist af mannskaða.

Fyrsti hluti lóðar verður ekki boðin út

Urgur er í verktökum í kjölfar frétta um að semja eigi útboðslaust um fyrsta hluta lóðaframkvæmda við Tónlistar- og ráðstefnuhússins við Reykjavíkurhöfn. Þeir vilja þó ekki gagnrýna borgaryfirvöld opinberlega, af ótta við að verða settir út í kuldann.

Varnarmálaviðræður hefjast á fimmtudag

Stefnt er að því að viðræður um varnarmál milli Íslands og Bandaríkjanna hefjist að nýju á fimmtudag í Washington. Þetta var ákveðið á fundi Geirs H. Haarde, utanríkisráðherra og Nick Burns, aðstoðarutanríkisráðherra Bandaríkjanna í London í dag.

Minni Fríhöfn ógnar atvinnulífi á Suðurnesjunum

Framkvæmdastjóri Fríhafnarinnar segir það ógna atvinnulífi á Suðurnesjum verði bannað að selja annað en áfengi og tóbak í komufríhöfninni. Ef af verður þarf að segja um fimmtíu starfsmönnum upp störfum.

Borgin ætlar í mál vegna samráðs olíufélaganna

Borgarstjóri ætlar að sýna olíufélögunum tennurnar. Hann hefur skipað lögmanni borgarinnar að fara í mál vegna samráðsins.

Starfsmannaleigum gæti fækkað með tilkomu nýrra laga

Vinnumálastofnun reiknar með að ný lög um starfsmannaleigur verði til þess að margar þeirra leggi upp laupana. Hinar verði undir ströngu eftirliti og verði lokað ef þær misstígi sig.

Virðingarleysi að birta teikningarnar af Múhameð spámanni

Fræðslufulltrúi þjóðkirkjunnar segir að það beri ekki vott um þroska að smána minnihlutahóp í landinu. Formaður félags múslima á Íslandi segir að bannað sé í Íslam að myndgera spámennina.

Danski Rauði krossinn flytur starfsmenn sína frá Miðausturlöndum

Ritstjórnarskrifstofur Jótlandspóstsins í Kaupmannahöfn og Árósum voru rýmdar nú síðdegis eftir að sprengjuhótun barst blaðinu. Nú skömmu fyrir fréttir var ákveðið að um gabb væri að ræða.

Forsætisráðherra Dana harmar deiluna milli Dana og múslima

Anders Fogh Rasmussen, forsætisráðherra Dana, harmar deiluna sem komin er upp milli Dana og múslima í Danmörku. Hann leggur áherslur á að mikilvægt sé til að leysa deiluna friðsamlega og það sem fyrst.

Bahá'íar sækjast ekki eftir að gefa samknynhneigða saman

Bahá' íar á Íslandi segjast ekki munu sækjast eftir að gefa samkynhneigða saman í hjónaband en segja fordóma gagnvart samkynhneigðum vera í andstöðu við trú sína. Þetta kemur fram í umsögn sem Andlegt þjóðarráð bahá' ía á Íslandi sendi nýverið Alsherjanefnd Alþingis sem hafði áður óskað eftir umsögn trúfélagsins um frumvarp til laga um réttarstöðu samkynhneigðra.

Menntamálaráðuneyti veitir styrki til atvinnuleikhópa

Styrkir til atvinnuleikhópa og starfslaun úr listamannasjóði voru afhent við hátíðlega athöfn í Iðnó í dag. Það er Menntamálaráðuneyti og listasjóður sem veitir styrkina sem ætlaðir eru til að styrkja starfsemi atvinnuleikhópa.

Þorsteinn nýr ritstjóri Fréttablaðsins

Þorsteinn Pálsson hefur verið ráðinn nýr ritstjóri Fréttablaðsins og mun starfa þar við hlið Kára Jónassonar.

Umræður um varnarmál hefjast á ný

Stefnt er að því að viðræður um varnarmál milli Íslands og Bandaríkjanna hefjist að nýju á fimmtudag í Washington. Þetta var ákveðið á fundi Geirs H. Haarde, utanríkisráðherra og Nick Burns, aðstoðarutanríkisráðherra Bandaríkjanna í London í dag.

Hótunin var gabb

Sprengjuhótunin sem barst Jótlandspóstinum reyndist vera gabb. Full starfsemi er hafin í húsinu að nýju en lögreglan rannsakar málið.

Sprengjuhótun barst Jótlandspóstinum

Byggingar Jótlandspóstsins í Árósum og Kaupmannahöfn í Danmörku voru rýmdar fyrr í dag, eftir að sprengjuhótun barst á ritstjórn blaðsins. Hringt var á blaðið og sagt að sprengju hefði verið komið fyrir. Mikil reiði ríkir meðal múslima í garð blaðsins, eftir að það birti tólf skopmyndir af Múhameð spámanni síðastliðið haust.

Reykingar bannaðar með öllu á veitinga- og skemmtistöðum

Jón Kristjánsson, heilbrigðisráðherra, mælti fyrir frumvarpi um reykingarbann á Alþingi í dag. Frumvarpið felur það í sér að reykingar á veitinga- og skemmtistöðum verði bannaðar með öllu frá og með 1. júní 2007.

Þoturnar eftir en þyrlurnar á brott?

Svo gæti farið að björgunarþyrlur varnarliðsins yrðu fluttar á brott en herþotur Bandaríkjamanna yrðu hér áfram. Valur Ingimundarson, sagnfræðingur, fullyrðir að Bandaríkjamenn séu tilbúnir að skilja að rekstur á þyrlum og þotum til þess að svo megi verða en það hafi ekki verið gert hingað til. Þetta sé nýr flögur á varnarviðræðum Íslendinga og Bandaríkjamanna.

Arnarfell bauð lægst

Í dag voru opnuð tilboð í Hraunveitu, sem er einn áfangi í byggingu Kárahnjúkavirkjunnar. Var það verktakafyrirtækið Arnarfell sem bauð lægst eða tæpar 980 milljónir sem svarar til um sjötíu prósenta af kostnaðaráætlun.

Methagnaður Íslandsbanka

Íslandsbanki kynnti í dag uppgjör sitt fyrir árið 2005. Var hagnaður fyrirtækisins rúmir nítján milljarðar eftir skatta og arðsemi eigin fjár 30 prósent. Hagnaðurinn jókst um 60 prósent á milli ára en var 12 milljarðar árið 2004. Fyrirtækið skilaði skatttekjum upp á um 4,3 milljarða til ríkissjóðs.

Tveir nýir metanvagnar

Strætó bs. kynnti í dag tvo nýja almenningsvagna, sem ganga fyrir metani. Þar með hefur fyrirtækið stigið enn eitt skrefið í þá átt að draga úr útblástursmengun á höfuðborgarsvæðinu. Áður hafði Strætó bs. verið frumkvöðull í notkun vetnisknúinna bifreiða hér á landi.

Blóðug átök á Filippseyjum

Hersveitir skutu að minnsta kosti átján uppreisnarmenn til bana í smábæ á Filippseyjum í dag í blóðugustu átökum þarlendis í marga mánuði. Átök á milli stjórnarhers og sósíalískra uppreisnarmanna hafa þó staðið í nær hálfa öld á Filippseyjum.

Ný reglugerð um loðnuveiðar

Sjávarútvegsráðuneytið hefur gefið út reglugerð um loðnuveiðar íslenskra skipa á tímabilinu frá 31. janúar 2006 til og með 30. apríl 2006. Samkvæmt reglugerðinni verður leyfilegur heildarafli íslenskra skipa 47.219 lestir af loðnu.

Fundað um fuglaflensu

Stjórnendur Landbúnaðarstofnunar hafa ákveðið að fara í fundaferð um landið til að kynna bændum og dýralæknum varnir gegn fuglaflensu og viðbrögð ef sjúkdómurinn berst hingað.

Verkalýðsfélag Húsavíkur fagnar tillögu launanefndar

Verkalýðsfélag Húsavíkur fagnar tillögum Launanefndar sveitarfélaga um að hækka lægstu laun sérstaklega umfram ákvæði kjarasamninga. Samþykktin nær til starfsmanna sveitarfélaga sem hafa 140 þúsund krónur á mánuði eða minna. Reiknað er með að lægstu laun hækki um 12%.

Tíu ritverk koma til greina

Tíu ritverk hafa verið tilnefnd af Reykjvíkurakademíunni sem afburðar fræðirit að mati Viðurkenningarráðs Hagþenkis á síðasta ári. Koma þessi rit til greina við veitingu viðurkenningar Hagþenkis sem afhent verður í lok febrúar en viðurkenningin nemur um sjöhundruð og fimmtíu þúsundum króna.

Íslensk kvikmynd tilnefnd til Óskarsverðlauna

"Síðasti bærinn" í leikstjórn Rúnars Rúnarssonar er tilnefnd til Óskarsverðlauna í flokki leikinna stuttmynda. Í aðalhlutverki er gamla leikarakempan Jón Sigurbjörnsson. Þetta er í annað sinn sem íslensk kvikmynd er tilnefnd til Óskarsverðlauna. Aðeins einu sinni áður hefur íslensk kvikmynd verið tilnefnd til óskarsverðlauna en það var fyrir fjórtán árum þegar mynd Friðriks Þórs Friðrikssonar, Börn náttúrunnar var tilnefns í flokki erlendra kvikmynda.

Afskipti Alþingis orsaka stjórnskipulegan vanda

Halldór Halldórsson, dómstjóri Héraðsdóms Norðurlands vestra, segir það ekki gott að Alþingi grípi fram fyrir hendur Kjaradóms eins og gert var varðandi úrskurð Kjaradóms um laun æðstu embættismanna. Dómarar íhuga nú lögsókn vegna málsins.

Neita kröfum Sameinuðu þjóðanna

Hamas-samtökin hafa neitað kröfu Sameinuðu þjóðanna um að viðurkenna tilverurétt Ísraelsríkis og ætla ekki að leggja niður vopn. Þeir krefjast þess þó að Evrópusambandið haldi áfram fjárframlögum til Palestínu.

Framboðslisti VG í Kópavogi

Á félagsfundi Vinstri grænna í Kópavogi í gærkvöldi var framboðslisti hreyfingarinnar fyrir sveitarstjórnarkosningarnar í vor samþykktur. Í prófkjöri sem hreyfingin hélt í nóvember síðast liðnum hlaut Ólafur Þór Gunnarsson flest atkvæði í fyrsta sæti og leiðir því flokkinn í vor. Fyrstu fjögur sætin voru bundin eftir kosninguna og í örðu sæti listans er Guðbjörg Sveinsdóttir, í þriðja Emil Hjrövar Petersen og fjórða sætið skipar Lára Jóna Þorsteinsdóttir.

Verða að greiða fyrrum starfsmanni laun

G.P.G fiskvinnsla verður að greiða fyrrum stjórnanda fiskvinnslunnar Jökuls á Raufarhöfn hálfa þriðju milljón króna sem hann á hjá félaginu í ógreiddum launum.

Ofsatrúarmenn í Írak hvetja til árása

Hópur herskárra ofsatrúarmanna í Írak hvetur meðlimi sína til að ráðast á þá Dani og Norðmenn sem meðlimirnir mögulega ná til. Ástæðan eru skopteikningarnar af spámanninum Múhameð sem birst hafa í dagblöðum í löndunum tveimur

Ný göngudeild opnuð á LSH á morgun

Ný göngudeild fyrir átröskunarsjúklinga verður opnuð á Landspítalanum Háskólasjúkrahúsi á morgun. Talsmenn Spegilsisns, samtaka aðstandenda átröskunarsjúklinga segja deildina stökk fram á við í meðferð sjúkdómsins. Þeir segja þó mikl aþörf á frekari úrræðum. Allt að 5.000 einstaklingar þjást af átröskunum á Íslandi í dag en aðeins 60 prósent sjúklinganna ná sér að fullu.

Reykjavík er þriðja dýrasta borg heims

Osló er orðin dýrasta borg heims samkvæmt úttekt Greiningardeildar Economist. Reykjavík tekur stórt stökk upp á við, fer úr áttunda sæti í þriðja á listanum yfir dýrustu borgir heims.