Ástandið í Danmörku fegrað

Mogens Lykketoft, formaður Sósíaldemókrata, segir kosningabaráttuna í Danmörku vera erfiðari en oft áður og sakar stjórnvöld í landinu um að mála glansmynd af ástandinu í landinu. Sighvatur Jónsson, fréttamaður Stöðvar 2 og Bylgjunnar, er í Danmörku og hitti Lykketoft að máli í morgun.

Óttast eftirhermuglæpi í BNA

Óttast er að Bandaríkjamaður sem reyndi að svipta sig lífi með því að leggja bíl sínum á lestarteina muni valda hrinu eftirhermuglæpa. Eitt tilvik er þegar í skoðun lögreglu.

Ákvörðun Sýslumanns felld úr gildi

Hæstiréttur felldi í gær úr gildi ákvörðun Sýslumannsins á Seyðisfirði um að Síldarvinnslunni í Neskaupstað bæri að greiða stimpilgjald vegna samruna Síldarvinnslunnar og SR-mjöls. Jónas A. Aðalsteinsson hæstaréttarlögmaður, sem sótti málið fyrir hönd Síldarvinnslunnar, segir að hér sé um ákaflega merkilegan dóm að ræða.

Hildur skipuð forstjóri

Björn Bjarnason dómsmálaráðherra hefur skipað Hildi Dungal í embætti forstjóra Útlendingastofnunar frá og með 1. febrúar. Hún tekur við af Georgi Lárussyni sem er orðinn forstjóri Landhelgisgæslunnar. Hildur er 33 ára lögfræðingur.

Annan talar til uppreisnarmanna

Kofi Annan talaði í dag til uppreisnarmanna í Írak og bað þá um að hindra ekki kosningarnar í landinu sem fram eiga að fara á sunnudaginn. Óöldin sem geisað hefur í Írak hefur færst í aukana undanfarið eftir því sem nær dregur kosningum og tugir manna fallið og enn fleiri liggja sárir.

200 umsóknir

200 umsóknir hafa borist Impregilo frá Eures-vinnumiðluninni. Þetta eru umsóknir frá fólki í Evrópu. Nokkrum hefur þegar verið boðið starf.

Reglugerðin eftir helgi

Reglugerðinni sem félagsmálaráðherra hafði boðað seinkar þar sem verið er að fara yfir athugasemdir ASÍ og SA. Í henni er meðal annars tekið tillit til gagnrýni verkalýðshreyfingarinnar á Impregilo.

Óendurnýjanleg atvinnuleyfi

Verið er að kanna hjá Vinnumálastofnun og félagsmálaráðuneytinu hvort hægt sé að gefa út óendurnýjanleg atvinnuleyfi með svipuðum hætti og óendurnýjanleg dvalarleyfi til að koma til móts við vinnuaflsþörf verktakafyrirtækjanna í landinu.

15 atvinnuleyfi

Vinnumálastofnun gaf í gær út 15 atvinnuleyfi til viðbótar við þau 24 sem gefin voru út fyrr í vikunni.

Bjórframleiðsla að hefjast?

Stefnt er að því að bjórframleiðsla hefjist í Skagafirði í haust. Kynningarbæklingur verður sendur til fjárfesta í febrúar.

Dæmdur í 18 mánaða fangelsi

Héraðsdómur Reykjavíkur dæmdi í dag mann á fertugsaldri í átján mánaða fangelsi fyrir að hafa ekki komið ungri konu undir læknishendur þegar hún veiktist lífshættulega eftir að hafa tekið inn banvænan skammt af kókaíni og E-töflum í húsi við Lindargötu í ágúst í hitteðfyrra.

Óverjandi notkun skattfés

Frjálshyggjufélagið segir að það sé óverjandi að stjórnvöld skuli taka fé af einstaklingum með skattheimtu og nota í fjárfestingar af ýmsu tagi. Félagið segir þetta í kjölfar þeirra upplýsinga sem nýverið komu fram á Alþingi þess efnis að ríkið ætti hlut í yfir 300 fyrirtækjum.

Og Vodafone kvartar undan Símanum

Fjarskiptafyrirtækið Og Vodafone sendi Póst- og fjarskiptastofnun erindi í dag þar sem kvartað er undan töfum á afgreiðslu þjónustubeiðna til Símans og óskar eftir atbeina stofnunarinnar til þess að Síminn fari að lögum. Í erindinu er það rakið að Síminn hafi látið hjá líða að afgreiða u.þ.b. 90 pantanir á ADSL-tengingum frá því um miðjan desember.

Ísfélagið kaupir Júpíter ÞH

Ísfélagið hefur keypt loðnuskipið Júpíter ÞH og ætlar að nota hann til loðnuflutninga af miðunum í loðnubræðslu félagsins í Krossanesi við Eyjafjörð. Aflanum verður þá dælt úr veiðarfærum veiðiskipa yfir í Júpíter sem flytur hann í land svo veiðiskipin tefjist ekki við að sigla í land sjálf með afla sinn.

Ekkert verður af Arnardalsvirkjun

Með friðun Jökulsár á Fjöllum verður ekkert af svokallaðri Arnardalsvirkjun. Með virkjun hefði Arnardal verið sökkt og Dettifossi breytt.

Nýtt varðskip á rekstrarleigu

Georg Lárusson, forstjóri Landhelgisgæslunnar, vill að nýtt varðskip verði leigt en ekki keypt. Hann telur óskynsamlegt að verja þremur milljörðum króna til kaupa á nýju skipi.

Áhrif karlhormónsskorts á akstur

Þýskir vísindamenn segjast hafa sannanir fyrir því að það sé skortur á karlhormónum sem valdi því að konur geti ekki lagt bílum í stæði. Einnig báru þeir saman lengd baugfingurs og vísifingurs á sjálfboðaliðum sínum og segja að tengsl séu milli lítils magns af karlhormónum og stuttum baugfingri.

32 fallið á tveimur dögum

Tólf manns hið minnsta liggja í valnum eftir árásir dagsins, þar af tveir bandarískir hermenn. Í gær létust tuttugu, þar af einn Bandaríkjamaður.

Átök framsóknarkvenna

Una María Óskarsdóttir fyrrum aðstoðarmaður Sivjar Friðleifsdóttur var felld úr stjórn Freyju, félags framsóknarkvenna í Kópavogi á aðalfundi á fimmtudagskvöld. Una var varaformaður félagsins.

Mótmæla veru Mjallar Friggjar

Fjórir eigendur fyrirtækja í Vesturvör 30b í Kópavogi hafa afhent bæjaryfirvöldum skrifleg mótmæli vegna klórframleiðslu Mjallar Friggjar í húsinu á móti.

Mikil breyting í Miðausturlöndum

Meiri háttar breyting til batnaðar hefur orðið í samskiptum Ísraels og Palestínu síðustu vikurnar. Ofbeldisverkum hefur snarfækkað og í fyrsta sinn í fjögur ár eru menn vongóðir um friðarhorfur.

Flugleiðir á stöðugri uppleið

Hlutabréf í Flugleiðum hafa verið á stöðugri uppleið undanfarin þrjú ár og tóku mikið stökk í gær og fyrradag. Baugur er farinn að kaupa sig aftur inn í félagið.

Hörð valdabarátta innan Framsóknar

Formaður Landssambands framsóknarkvenna, Una María Óskarsdóttir, var felld úr stjórn Félags framsóknarkvenna í Kópavogi í gær. Innanbúðarmenn segja að í stjórnarkjöri kvenfélagsins kristallist hörð valdabarátta innan flokksins.

Fullyrðingum ráðherra vísað á bug

Landsvirkjun vísar á bug þeim fullyrðingum iðnaðarráðherra að fyrirtækið hafi hækkað rafmagnsverð umfram verðlagsþróun til þess að bæta hag sinn. 

Sambandslaust í hættuástandi

Það er ekki í valdi Símans að koma í veg fyrir snjóflóð, að sögn Evu Magnúsdóttur, upplýsingafulltrúa fyrirtækisins. Þetta kom fram í svari Símans við fyrirspurn Ómars M. Jónssonar, bæjarstjóra í Súðavík, sem hann sendi vegna þess að bærinn varð algjörlega símasambandslaus í óveðri 4. janúar síðastliðinn. Á sama tíma var ófært á milli Súðavíkur og Ísafjarðar.

Vilja stöðva Iceland

Samtök iðnaðarins hafa ákveðið að senda inn athugasemdir til bresku einkaleyfastofunnar og Evrópusambandsins vegna áforma verslunarkeðjunnar Iceland Foods í Bretlandi um að skrá vörumerkið Iceland í fjölmörgum vöruflokkum í Bretlandi og innan Evrópusambandsins.

Símamenn fella samninga

Símsmiðir og rafeindavirkjar hjá Símanum hafa fellt kjarasamninga sem Rafiðnaðarsambandið gerðu við fyrirtækið. Á kjörskrá voru 250 manns en 133 greiddu atkvæði. Rúmlega helmingur þeirra, eða 71, greiddi atkvæði gegn samningnum en 61 félagsmaður samþykkti hann.

Launamunur aldrei meiri

Launamunur hefur aukist mikið hér á landi miðað við alþjóðlega Gini-stuðulinn sem mælir tekjudreifingu. Kvarðinn tekur gildi frá núll og upp í einn, en því hærri sem hann er, því ójafnari er dreifing tekna. Samkvæmt upplýsingum frá fjármálaráðherra hefur mismunur ráðstöfunartekna hjóna og sambúðarfólks aukist úr 0,206 árið 1995 í 0,3 árið 2003.

Stormasamt á landinu

Mjög hvasst var sums staðar á Vestfjörðum í gær. Lögreglan bað fólk um að vera ekki á ferli að nauðsynjalausu en vindhviður mældust yfir fjörutíu metrar á sekúndu á Þverfjalli. Áð sögn lögreglu á Ísafirði í gærkvöld hafði kvöldið reynst slysalaust, en lausir munir fuku á bíl á Þingeyri.

Rice á leið til Palestínu

Fyrsta opinbera heimsókn Condoleezza Rice sem utanríkisráðherra Bandaríkjanna verður til Mið-Austurlanda. Háttsettir menn innan ráðuneytisins segja að vegna batnandi samskipta Ísraela og Palestínumanna vilji Rice leggja áherslu á að koma friðarviðræðum á skrið

Kúariða greindist í geit

Evrópskir vísindamenn hafa staðfest að í fyrsta skiptið hafi Creutzfeldt-Jakob sjúkdómurinn (kúariða) greinst í geit. BBC greinir frá þessu.

Skeytti ekki um líf ungrar stúlku

Maður hefur verið dæmdur í eins og hálfs árs fangelsi fyrir að hafa ekki komið ungri stúlku í bráðri lífshættu til hjálpar. Alvarlegt brot sem ber vott um skeytingarleysi gagnvart lífi stúlkunnar, segir í dómnum.

Cox á móti Hillary

Edward Cox, tengdasonur Richards Nixon, fyrrverandi forseta Bandaríkjanna, íhugar að bjóða sig fram á móti Hillary Clinton í kosningum til öldungardeildar þingsins á næsta ári.

Hertar öryggiskröfur í Írak

Á annan tug óbreyttra borgara og íraskra lögreglumanna létust í árásum uppreisnarmanna í Írak í gær. Þá voru fimm bandarískir hermenn drepnir í þremur árásum í Bagdad.

Lekinn fordæmdur

Utanríkismálanefnd fordæmir harðlega að trúnaðarupplýsingar frá fundum nefndarinnar um Íraksmálið hafi komist í hendur Fréttablaðsins. Hætt verður að dreifa fundargerðum. Stjórnarandstaðan fer fram á að trúnaði verði aflétt af ummælum Halldórs Ásgrímssonar tengdum Írak.

Rangt hjá Siv

Fulltrúar meirihluta í stjórn Freyju, félags framsóknarkvenna í Kópavogi, segja rangt sem Siv Friðleifsdóttir, þingmaður Framsóknarflokksins, segir á heimasíðu sinni að fundarkonur á fundi félagsins í gær hafi sjálfar tekið þátt í að kjósa sig inn í félagið.

Hættir dreifingu fundargerða

Utanríkismálanefnd hefur ákveðið að hætta dreifingu fundargerða til þess hóps sem þær hefur fengið og verða þær framvegis eingöngu aðgengilegar til aflestrar á fundum nefndarinnar og hjá ritara hennar milli funda.

Fjölmenni á borgarafundi í Eyjum

Hátt í fimm hundruð manns mættu á borgarafund í Vestmannaeyjum í gærkvöldi þar sem Árni Johnsen, fyrrverandi alþingismaður, lagði fram skýrslu um hugsanlega gangagerð milli Eyja og lands. Hann sagði að yfirmenn sænska verktakafyrirtækisins NCC hefðu farið yfir skýrsluna og vitað að hann ætlaði að kynna hana opinberlega. Þeir hafi ekki gert athugasemdir við það.

Hefur ekki skilað lægra vöruverði

Sterk staða krónunnar hefur í mörgum tilvikum ekki skilað sér í lægra verði á innfluttum vörum, samkvæmt athugun sem Alþýðusamband Íslands hefur gert nokkur ár aftur í tímann. Þegar dollarinn var sem sterkastur fyrir nokkrum misserum og var kominn upp í 110 krónur hækkuðu nær allar vörur til samræmis við það.

Rice orðin utanríkisráðherra

Condoleezza Rice sór í gær embættiseið sem utanríkisráðherra Bandaríkjanna og hefur störf í dag. 85 þingmenn öldungadeildar samþykktu Rice í embættið en 13 greiddu atkvæði gegn því. Ekki hafa jafnmargir öldungadeildarþingmenn lagst gegn embættistöku utanríkisráðherra Bandaríkjanna síðan árið 1825.

Telja menn hafa skapað alnæmi

Nærri 40 prósent blökkumanna í Bandaríkjunum telja að menn hafi skapað alnæmi, samkvæmt nýrri könnun ríkisháskólans í Oregon-fylki. Könnunin náði til fimm hundruð blökkumanna í Bandaríkjunum og taldi fjórðungur þeirra að vísindamenn á vegum hins opinbera hefðu skapað HIV-veiruna en um tólf prósent voru á því að bandaríska leyniþjónustan stæði á bak við sjúkdóminn.

Snjóar mikið á Spáni

Víða á norðurhluta Spánar hefur mikið snjóað undanfarna daga og hefur sums staðar gengið erfiðlega að moka vegna stöðugrar ofankomu. 675 snjóruðningsbílar hafa verið ræstir út og eins eru 60 þúsund tonn af salti til reiðu til að sigrast á hálku sem búist er við að fylgi snjókomunni.

Þungatakmarkanir á sumum vegum

Aurbleytu er sums staðar farið að gæta á malarvegum vegna hlákunnar að undanförnu, en athygli vekur að Vegagerðin hefur víða sett þungatakmarkanir á vegi með bundnu slitlagi. Að sögn Vegagerðarinnar er það vegna þess að klaki, sem enn er í jörðu undir vegunum, hindrar að vatn renni undan slitlaginu.

Búist ekki við betri árangri

Palestínumenn ættu ekki að búast við því að ná betri árangri í friðarviðarviðræðum nú en árið 2000 þegar Bill Clinton Bandaríkjaforseti miðlaði málum. Þetta segir Madeleine Albright, utanríkisráðherra í tíð Clintons. Árið 2000 var til umræðu að Ísraelsmenn hörfuðu langleiðina að landamærunum eins og þau voru árið 1967 en Jassir Arafat sætti sig ekki við þá niðurstöðu.

Múslímar íhuga að stofna dagblað

Múslímar í Danmörku leggja á ráðin um stofnum dagblaðs. Um 170 þúsund múslímar búa í Danmörku og finnst þeim mörgum sem þeir fái litla umfjöllun og athygli í fjölmiðlum. Nýleg könnun leiddi í ljós að 87 prósentum aðspurðra þótti það góð hugmynd að stofna sérstakt dagblað múslíma.