Tottenham borgar 8,6 milljarða fyrir Xavi Simons

Tottenham borgar sextíu milljónir evra fyrir leikmanninn eða meira en 8,6 milljarða króna.

Simons er 22 ára gamall en hann kom til London í gær til að ganga frá öllum lausum endum.

Simons hefur spilað í þýsku deildinni frá 2023 en hann kom þangað fyrst á láni frá Paris Saint-Germain. Leipzig keypti hann síðan í janúar.

Með Leipzig þá var Simons með 22 mörk og 24 stoðsendingar í 78 leikjum.

Simons var á sínum tíma í akademíu Barcelona en fór mjög ungur til Parísar.

Simons hefur verið eftirsóttur lengi og sýndi Englendingum gæði sín þegar hann skoraði á móti Englandi í undanúrslitaleik Evrópumótsins 2024.

Simons fær sjöuna hjá Tottenham. Þetta er ungur leikmaður sem hefur alla burði til að þroskast og dafna hjá Spurs.

Hann kemur inn í lið sem hefur unnið tvo fyrstu leiki sína í ensku úrvalsdeildinni.