Veður

Gott að hreinsa vel frá niður­föllum í kvöld

Lovísa Arnardóttir og Bjarki Sigurðsson skrifa
Marcel varar við erfiðum aðstæðum þegar hlýnar í nótt. Þá bráðni snjór og geti myndast hálka.
Marcel varar við erfiðum aðstæðum þegar hlýnar í nótt. Þá bráðni snjór og geti myndast hálka. Stöð 2

Seint í kvöld og nótt er spáð hlýju veðri og talsverðri rigningu, einkum á sunnanverðu landinu. Búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gefin hefur verið út gul viðvörun vegna veðursins.

„Það byrjar að rigna á sunnanverðu landinu í kvöld og það fylgja því hlýindi,“ sagði Marcel De Vries veðurfræðingur á Veðurstofunni í kvöldfréttum Stöðvar 2 í kvöld. Hann sagði hitastig fara upp í allt að átta stig við suðurströndina og fjögur eða fimm stig á höfuðborgarsvæðinu. Þess vegna hefði hann gefið út gula viðvörun vegna hláku í kvöld og í nótt.

Hann sagði að mjög líklega myndi mikill snjór bráðna og því mætti búast við miklu vatni og mögulega stífluðum niðurföllum. Hann mælti með því að huga að niðurföllum til að forðast tjón.

Þá varaði hann einnig við því að það myndaðist við þessar aðstæður víða mikil hálka ofan á bráðnum snjónum.

Fyrri veðurviðvörunin tekur gildi klukkan 23 í kvöld og rennur út um klukkan sex í fyrramálið. Það er svo um klukkan tíu eða ellefu í fyrramálið sem önnur viðvörun tekur gildi, en þá vegna éljagangs og hvassviðris.

„Það kólnar smám saman og um tíu ellefuleytið breytist þetta í él og hvessir enn. Síðdegis verðum við komin með 15 til 23 metra á sekúndu á vestan og sunnanverðu landinu með éljagangi. Ástandið verður mjög svipað og í gær. Stundum er það rólegt og gott og svo kemur éljahríð og þá verður blint í stutta stund,“ sagði Marcel.

Niðurföll skráð í borgarvefsjá

Slökkviliðið á höfuðborgarsvæðinu gaf út í morgun að gott væri fyrir fólk að huga að niðurföllum.

Niðurföll í Reykjavík hafa verið kortlögð að hluta til. Þau sem eru skráð sjást ef kveikt er á fráveitu í Borgarvefsjá (merkt N).Sjá hér

Óvissustig víða á vegum

Vegagerðin varar við erfiðum akstursskilyrðum á morgun, föstudag, víða um land. Vegir hafa verið settir á óvissustig og getur komið til lokana með litlum eða engum fyrirvara.

Óvissustig verður á eftirfarandi vegum:

Suðvesturland: Reykjanesbraut, Grindavíkurvegur, Hellisheiði, Þrengsli, Kjalarnes, Mosfellsheiði og Suðurstrandarvegur, óvissustig frá kl. 10:00 2. feb. – kl. 7:00 3. feb. Krýsuvíkurvegur lokar snemma morguns.

Vesturland: Hafnarfjall, óvissustig frá kl. 10:00 2. feb. – kl. 7:00 3. feb. Hvalfjörður, Akrafjallshringur, Borgarfjörður og Mýrar, óvissustig frá kl. 10:00 2. feb. – kl. 7:00 3. feb.

Norðurland: Öxnadalsheiði, óvissustig 7:00 2. feb – 7:00 3. feb.

Suðurland: Hringvegur (1) milli Hveragerðis og Markarfljóts, Árborgarhringur, Lyngdalsheiði og uppsveitir Suðurlands, óvissustig frá kl. 10:00 2. feb. – kl. 7:00 3. feb.

Vegfarendur eru hvattir til að kynna sér veðurspá áður en lagt er í ferðalag.

Veður Færð á vegum Slökkvilið

Tengdar fréttir

Vegagerðin varar við flughálku

Veðurfræðingur Vegagerðarinnar varar við því að flughált verði á sumum vegum í dag, helst á Suður- og Vesturlandi.

Varað við asa­hláku, hálku og miklum leysingum

Veðurstofan gerir ráð fyrir áframhaldandi suðvestanátt á landinu í dag en að hún verði þó ekki jafn hvöss og í gær. Má reikna með að vindur verði yfirleitt átta til fimmtán metrar á sekúndu. Það hlýnar þegar líður á daginn og hafa verið gefnar út gular viðvaranir vegna asahláku.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið