Íslenska óperan muni neyðast til að hætta starfsemi

Máni Snær Þorláksson skrifar 15. ágúst 2023 14:15

Myndin er frá sýningu á óperunni Ragnheiði í Hörpu árið 2014. GÍSLI EGILL HRAFNSSON

Rekstrarframlögum til Íslensku óperunnar verður hætt að því fram kemur í áskorun frá stjórn stofnunarinnar. Að því er fram kemur í áskoruninni er niðurskurðurinn svo mikill að stofnunin sér ekki annað í stöðunni en að hætta starfsemi.

„Íslensku óperunni hefur verið tilkynnt að rekstrarframlögum til stofnunarinnar verði hætt, áður en búið er að móta framtíð óperustarfseminnar á landinu sem skapar óhjákvæmilega mikla óvissu,“ segir í áskorun Íslensku óperunnar til Katrínar Jakobsdóttur forsætisráðherra.

Þá er áskorunin einnig stílað á Lilju Dögg Alfreðsdóttur menningarmálaráðherra og Bjarna Benediktsson fjármálaráðherra.

Áskorunina ritar Pétur J. Eiríksson, formaður stjórnar Íslensku óperunnar, fyrir hönd stjórnarinnar.

„Niðurskurðurinn er svo róttækur að ekki verður séð annað en að stofnunin neyðist til þess að hætta starfsemi. Þó er gert ráð fyrir að óperan fái verkefnastyrk til þess að sviðsetja óperuna Agnesi eftir Daníel Bjarnason haustið 2024, en ríkisstjórnin styrkti pöntun verksins á sínum tíma.“

Skora á ríkisstjórnina

Pétur segir í áskoruninni að Íslenska óperan hafi haldið uppi fjölbreyttri starfsemi í rúma fjóra áratugi. Allt frá byrjun hafi starfsemin einkennst af miklum listrænum metnaði. Ekki verði um það deilt að stofnunin hafi haft „algjöra forystu á sviði óperuflutnings á Íslandi.“

Einnig segir Pétur að ekki verði um það deilt að stofnunin hafi nýtt fjármagn sitt með hagnýtum hætti. „Til vitnis um þetta má skoða samanburð við rekstur sambærilegra óperustofnanna í nágrannalöndum okkar.“

Að lokum er skorað á ríkisstjórnina að standa vörð um menningarstarfsemina sem Íslenska óperan hefur staðið fyrir. Þannig megi koma í veg fyrir það „menningarslys sem af því hlytist að leggja stofnunina niður.“

Áskorunina í heild sinni má lesa hér fyrir neðan.

Íslensku óperunni hefur verið tilkynnt að rekstrarframlögum til stofnunarinnar verði hætt, áður en búið er að móta framtíð óperustarfseminnar á landinu sem skapar óhjákvæmilega mikla óvissu.

Niðurskurðurinn er svo róttækur að ekki verður séð annað en að stofnunin neyðist til þess að hætta starfsemi. Þó er gert ráð fyrir að óperan fái verkefnastyrk til þess að sviðsetja óperuna Agnesi eftir Daníel Bjarnason haustið 2024, en ríkisstjórnin styrkti pöntun verksins á sínum tíma.

Íslenska óperan hefur haldið uppi fjölbreyttri starfsemi í rúma fjóra áratugi. Allt frá byrjun hefur starfsemin einkennst af miklum listrænum metnaði og verður ekki um það deilt að stofnunin hefur haft algjöra forystu á sviði óperuflutnings á Íslandi.

Þá verður ekki heldur um það deilt að stofnunin hefur nýtt það fjármagn sem hún hefur haft til umráða með hagnýtum hætti. Til vitnis um þetta má skoða samanburð við rekstur sambærilegra óperustofnanna í nágrannalöndum okkar.

Íslenska óperan er í hugum landsmanna okkar Þjóðarópera. Hún hefur starfað í þágu þjóðarinnar af miklum stórhug og mörg hundruð listamenn hafa tekið þátt í uppfærslum hennar sem sýndar hafa verið fyrir mörg þúsund gesti ár hvert.

Stjórn Íslensku óperunnar skorar á ríkisstjórnina að standa vörð um þá mikilvægu menningarstarfsemi sem Íslenska óperan hefur staðið fyrir og koma í veg fyrir það menningarslys sem af því hlytist að leggja stofnunina niður.

Fyrir hönd stjórnar Íslensku óperunnar,

Pétur J. Eiríksson formaður stjórnar

Íslenska óperan Menning Rekstur hins opinbera