Nýársspá Siggu Kling - Nautið

Ef að líkami þinn hefur verið í einhverskonar fjötrum og gert þér erfitt fyrir, á það sama við um huga þinn.

Þann 21 og þann 22 janúar þegar að nýtt tungl fæðist, er það tungl Steingeitarinnar og Vatnsberans. Og á sama tíma er það tími kanínunnar sem markar upphaf kínverskar stjörnuspeki, og samtímis mun hið erfiða ár Drekans kveðja okkur.

Þetta verða sterk tímamót fyrir Nautsmerkið, því að lífið er að færast yfir í mýkra og sterkara horf fyrir þig. Þú hendir frá þér því sem að hefur gefið þér of mikinn drama. Þú munt ekki leitast eftir vorkunn af neinum toga, heldur skynja á umhverfi þínu að þú sért nóg, að ekkert er þér ómögulegt, svo stattu upp.

Febrúar færir þér líka merkilegar fréttir fyrir þig, en þú þarft að skilja að það er undir þér komið hvað þú heyrir eða sérð af þeim fréttum. Það er nefnilega þannig að ef þú brosir ekki, þá geturðu ekki búist við því að spegillinn brosi að þér, svo þarna þarftu sjálf að taka skrefið og að gera það sem þarf að gera.

Þú hefur bestu tjáninguna í gegnum lífsgleði og þú þarft að æfa þig. Því að enginn gefur þér gleðina, þú skapar hana sjálf. Þetta er mikilvægur mánuður upphafs, eins má segja um mars, apríl og maí.

Það virðist kannski ekki vera viturlegt af mér að segja þér að þú eigir að syngja eins og þú mögulega getur, en ef þér finnst það ómögulegt, þá byrjaðu bara ofurlítið á því á hverjum degi.

Þetta er svo miklu mildara og þægilegra en árið í fyrra og þetta er líka ár vatnsins og þá sérstaklega fyrir þig, hvort sem það er sjórinn, lækurinn eða baðið. Eða bara að drekka vatnið og finna af því bragðið, það mun hækka orkuna þína og orkusviðið þitt.

Þetta verður andlegt ár, sérstaklega sumarið og þú hittir manneskju sem breytir lífi þínu annaðhvort í vor eða sumar. Þú sannfærist um nýja hluti, breytir um skoðanir, því að þú skynjar svo vel að þú þarft ekki alltaf að hafa rétt fyrir þér.

Þú ert að ganga inn í nýjan og betri heim á þessu tímabili og þú verður svo sátt með gæðin sem þetta líf er að færa þér. Í þessu öllu saman þarftu líka að vita að þú ert hellisbúi. Þú þarft að eiga tíma fyrir þig til þess að hlaða batteríin, og það gerir þú allra best heima hjá þér.

Knús og kossar, Sigga Kling