Tónlist

„Fjallar að miklu leyti um þetta ferli mitt að verða ástfangin af konu”

Sylvía Rut Sigfúsdóttir skrifar
Margrét Rán
Margrét Rán Dóra Dúnu

Hljómsveitin Vök hefur látið til sín taka í útgáfumálum á þessu ári og sendir nú frá sér sína þriðju plötu sem nefnist einfaldlega VÖK. Eins og kom fram á Vísi fyrr í dag mun VÖK koma fram á Iceland Airwaves í ár.

 „Í okkar tilviki þá kom Covid á fullkomnum tíma því við vorum búin að ákveða að koma okkur fyrir í hljóðverinu, leggjast í dvala og gera plötu númer þrjú,” segir Margrét Rán Magnúsdóttir söngkona- og hljómborðsleikari sem skipar Vök ásamt Einari Stef bassaog gítarleikara og Bergi Dagbjartssyni trommuleikara. 

Margrét segir að ferlið hafi samt verið bæði krefjandi og einmannalegt út af heimsfaraldrinum.

„Tíminn virtist standa í stað en það var á einhvern undarlegan hátt dýrmætt að fá að upplifa þetta skrítna ástand. Ég er sannfærð um að þessar aðstæður hjálpuðu mér að fara djúpt innávið og rifja upp tímann þegar ég var að koma úr skápnum sem varð svo yrkisefnið. Það var kaffærandi fyrir mig að vera föst í sjálfri mér þegar ég var unglingur og skildi eftri sig djúp sár sem ég er ennþá að kljást við. Platan fjallar að miklu leyti um þetta ferli mitt að verða ástfangin af konu og koma út úr skápnum. Ég sé það svo skýrt núna hvað það er mikilvægt að fá að vera maður sjálfur. Platan hjálpaði mér að taka utan um þetta ferli og leyfa sárunum að gróa. Hún fjallar um mikilvægi þess að vera sýnilegur því við eigum öll skilið að fá að fá samþykki fyrir að vera við sjálf og líða vel í eigin skinni.” 

Hljómsveitin VÖKDóra Dúna

Öðruvísi ferli

Hjómsveitin hefur löngu getið sér gott orð fyrir draumkenndan og lagskiptan hljóðheim þar sem electro og indie poppi er blandað saman. Á þessari plötu leitast þau við að brjóta formið á lagasmíðunum og leika sér með óvænt og mótsagnakenndar hugmyndir. Hljómsveitin sá sjálf um upptökur á plötunni sem fóru fram í hljóðverum þeirra í Hafnarfirði og Reykjavík.  Platan geymir 12 lög sem mörg hafa verið gefin út. 

„Við vildum leyfa lögunum að njóta sín og hefum því kynnt þau eitt af öðru sl. ár,” segir Einar Stef.

„Þetta ferli er búið að vera öðruvísi en áður hjá okkur en við erum mjög ánægð með útkomuna.” 

Vök fengu David Wrench til liðs við sig til að hljóðblanda plötuna en hann hefur m.a. unnið með tónlistarfólki á borð við Jungle, David Byrne, Caribou og The XX. Auk þess vann Friðfinnur Oculus við hljóðblöndun plötunnar en Glenn Schick (Phoebe Bridgers, Future) masteraði hana. 

Hönnun umslags var í höndum Bobby Breiðholt og Maríu Guðjohnsen

Vök er á mála hjá alþjóðlega fyrirtækinu Nettwerk en gefa út undir eigin merkjum á Íslandi. Útgáfutónleikar verða í Gamla Bíó 21. október og á Græna hattinum 22. október. Plötuna má nú finna í heild sinni á Spotify.


Tengdar fréttir

Bjóða upp á dagpassa á Airwaves í ár

Iceland Airwaves er handan við hornið og enn bætast við íslenskar stórstjörnur. Í dag var tilkynnt að Vök, Bríet, The Vintage Caravan, Systur, Júníus Meyvant, Emmsjé Gauta og Atla Örvarsson munu koma fram. Úkraínsku Eurovisionfararnir Go_A, finnski raf- og harmónikku músíkantinn Antti Paalanen og palenstínski Grammy verðlaunahafinn Arooj Aftab verða einnig á hátíðinni.






Fleiri fréttir

Sjá meira


×