Innlent

Óttast að ríkið gæti verið bótaskylt dragist afléttingar á langinn

Fanndís Birna Logadóttir og Snorri Másson skrifa
Sigmar Guðmundsson, þingmaður Viðreisnar, segir ákveðið áhyggjuefni ef ríkisstjórnin ætlar að fara hægar í afléttingar en nauðsynlegt er.
Sigmar Guðmundsson, þingmaður Viðreisnar, segir ákveðið áhyggjuefni ef ríkisstjórnin ætlar að fara hægar í afléttingar en nauðsynlegt er.

Þingmenn Sjálfstæðisflokksins og Viðreisnar eru sammála um að forsendur fyrir núgildandi takmörkunum séu brostnar og mikilvægt sé að aflétta þeim sem fyrst. Þingmaður Viðreisnar telur mögulegt að ríkið gæti verið að kalla yfir sig bótaskyldu ef ekki verður aflétt tiltölulega hratt.

Áslaug Arna Sigurbjörnsdóttir, þingmaður Sjálfstæðisflokksins og vísinda-, iðnaðar- og nýsköpunarráðherra, og Sigmar Guðmundsson, þingmaður Viðreisnar, eru bæði sammála því að það séu litlar sem engar forsendur fyrir þeim samkomutakmörkunum sem nú eru í gildi.

Tíu manna samkomubann er nú í gildi, veitingastöðum gert að loka klukkan níu þar sem síðustu gestir þurfa að vera farnir út klukkan tíu, og skemmtistaðir sem ekki hafa veitingaleyfi hafa þurft að loka.

„Þetta eru mjög íþyngjandi takmarkanir á líf fólks, á fyrirtækjarekstur og við verðum auðvitað að geta komist eins hratt og hægt er í eðlilegt líf þegar að tölurnar blasa þannig við okkur að við erum í miklu betri stöðu nú en áður,“ segir Áslaug og tók þar með undir ummæli fjármálaráðherra frá því fyrr í vikunni.

Ríkisstjórnin mun kynna afléttingaráætlun sína á föstudaginn en Áslaug vildi lítið gefa upp hvað fælist í henni. „Við ætlum að ræða afléttingaráætlunina á föstudaginn og ég er bara mjög bjartsýn að við getum komist út úr þessu sem fyrst,“ segir Áslaug.

„Ég er mjög bjartsýn miðað við stöðuna. Við þurfum auðvitað að líta til annarra landa og alltaf annarra þátta og átta okkur á því að við þurfum að hafa mjög rík gögn til að viðhalda takmörkunum en ekki til að aflétta. Eðlilegt líf er án þessara takmarkana, án grímuskyldu án samkomutakmarkana,“ segir Áslaug.

Áslaug Arna Sigurbjörnsdóttir, þingmaður og ráðherra Sjálfstæðisflokksins, segist bjartsýn. 

Sigmar tekur í sama streng og segir ekki lengur rök fyrir því að fyrirtæki þurfi að loka eða skerða starfsemi sína meðan staðan á spítalanum er langt undir bjartsýnustu spám. Hann segir þó ákveðið áhyggjuefni ef ríkisstjórnin ætlar að fara hægar í afléttingar en nauðsynlegt er.

„Ég óttast það, og ætla að leyfa mér að segja það, að ríkið gæti verið að kalla yfir sig bótaskyldu ef það verður ekki aflétt tiltölulega hratt þessum hörðustu takmörkunum,“ segir Sigmar.

„Ég get alveg skilið það að menn vilji fara að einhverju leiti varfærnislega en þessar ströngustu takmarkanir hljóta að þurfa að hverfa strax og svo vonandi nokkuð ákveðin en kannski hóflega varfærin skref í framhaldinu. Ég vonast til þess að menn fari frekar eftir því sem Bjarni er að segja frekar en Willum er að tala um,“ segir Sigmar.


Tengdar fréttir

Lang­þráð hjarðó­næmi geti náðst eftir um tvo mánuði

„Spurningin sem á öllum brennur þessa stundina er hvenær getum við búist við að faraldrinum muni ljúka eða að minnsta kosti hvenær fer að draga verulega úr honum. Þessu er auðvitað ekki hægt að svara með neinni vissu en þó er hægt að segja að með þessum útbreiddu smitum í samfélaginu sem við erum nú að sjá þá styttist í að við förum að sjá fyrir endann á honum.“

Segir ljós við enda ganganna þrátt fyrir að mjög erfið staða blasi við

Víðir Reynisson segist uggandi yfir þeim breytingum sem voru kynntar í dag en telur engu að síður að um stórt og mikilvægt skref hafi verið að ræða. Gera má ráð fyrir að fleiri muni greinast smitaðir á næstunni og þarf fólk að vera undir það búið. Hann sér þó fram á bjartari tíma í vor. 

Miklar breytingar á sóttkví

Heilbrigðisráðherra hefur ákveðið að gera breytingar á sóttkví hér á landi. Frá og með miðnætti mun fólk sem verður útsett fyrir smitum utan heimilis ekki sæta sóttkví heldur fara í smitgát. Börn og unglingar verða algjörlega undanþegin reglum um smitgát.

Lögin skýr um að það beri að aflétta þegar forsendurnar eru brostnar

Fjármálaráðherra segir að heilbrigðisráðherra beri skylda til að líta til fleiri þátta heldur en sóttvarnalæknir telur upp þegar kemur að takmörkunum. Hann bendir að þróunin sé jákvæðari en fyrri spár gerðu ráð fyrir, forsendur fyrri aðgerða séu brostnar, og því beri að aflétta. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.