Birkir Blær kominn í fimm manna úrslit í Svíþjóð

Birkir Blær söng lagið Falla Fritt með söngvaranum Peter Jöback.

Það voru þau Erik Elias og Sunny Taylor sem duttu úr keppninni í kvöld.

Rætt var við Birki fyrir keppnina í Reykjavík síðdegis í dag en þar sagðist hann hafa verið stressaður yfir því að lagið væri á sænsku en hann hefði æft sig vel.

Þá sagðist Birkir vera farinn að finna fyrir frægðinni.

„Maður er alveg stoppaður svolítið út á götu og tekið myndir með manni,“ sagði hann. „Á meðan maður er í keppninni er maður í sjónvarpinu einu sinni í viku. Það er svolítil athygli á manni.“

Eins og fram hefur komið er fyrirkomulag þáttanna ólíkt því sem við þekkjum. Í hverjum þætti flytja keppendur lag og svo hafa áhorfendur heila viku til þess að kjósa og eru niðurstöður kynntar í næsta þætti.