Lífið

Rax Augnablik: „Ég er með tvær tennur, önnur er fyrir kjöt og hin er fyrir fisk“

Ása Ninna Pétursdóttir og Sylvía Rut Sigfúsdóttir skrifa
RAX

„Þetta var eins og fara inn í einhvern ævintýraheim þar sem að maður keyrði í þröngum fjallvegum og trén fuku framhjá, eins og þau væru tröll.“

Það var árið 2012 þegar ljósmyndarinn RAX fór til Portúgal að ganga um fjöllin. Hann vildi fara í hitann, trappa sig aðeins niður frá þessum kulda-ferðum.

Hann segir mest megnis hafa rignt en lýsir því hversu mikil upplifun það hafi verið að heimsækja þessi litlu fjallaþorp. Hann minnist sérstaklega þorpsins Lombardinha.

„Við vorum þarna á gangi og þarna voru mikið af svartklæddum konum. Þær sátu þarna á bekk, fjórar eða fimm og fóru að spjalla við okkur. Hressar og skemmtilegar stelpur, hétu allar María.“

Konurnar segir hann hafa haft mikinn áhuga á því að heyra hvaðan hópurinn kom og þegar þær fréttu að þau kæmi frá Íslandi urðu þær mjög undrandi.

„Elsta konan, lítil sæt og krúttleg hafði komið til Parísar þegar hún var ung og hafði hún verulegar áhyggjur af því hvað við værum langt frá heimahögum. Á einhver heima lengra en París, sagði hún.

Rax segir að næstum engan karlmann hafi verið sjáanlegan í þorpinu nema kannski einn og einn á stangli. Þegar Maríurnar voru spurðar hvar allir karlarnir væru kom glott á þær allar.

Þær bentu til fjalla og sögðu, Þeir eru þarna í fjöllunum.

Rax segir hópinn ekki strax hafa skilið hvað þær væru að meina en svo þegar litið var til fjalla þá sáu þau steinrunnin andlit í fjöllunum.

„Það var eins og allt þarna væri orðið gamalt, eins og að fara aftur í tímann. Við spurðum hver galdurinn væri við það að verða svona gamall en ein af Maríunum var að nálgast hundrað árin.“

María, sú elsta, sagði galdurinn vera þann að hafa gaman af lífinu og vera glaður og kátur.

„Það sést vel hvað ég er gömul. Ég er með tvær tennur, önnur er fyrir kjöt og hin er fyrir fisk.“

Frásögnina má heyra í heild sinni í spilaranum hér fyrir neðan. RAX Augnablik eru örþættir og Maríurnar í Lombardinha er rúmar fimm mínútur. 

Klippa: RAX Augnablik - Maríurnar í Lombardinha

Í þáttunum RAX AUGNABLIK segir ljósmyndarinn Ragnar Axelsson sögurnar á bak við margar af sínum þekktustu myndum. Ragnar hefur starfað á vettvangi í meira en fjörutíu ár og eru sögurnar hans ævintýralegar. Nýr þáttur kemur út á hverjum sunnudegi hér á Vísi og á Stöð 2+. 

Hægt er að sjá alla þættina HÉR á Vísi.


Tengdar fréttir

RAX Augnablik: „Þarna var hestur og ég gaf honum smá kók“

„Manni finnst svolítið eins og maður sé að endurtaka sig. Maður þarf alltaf að vera að reyna að finna eitthvað nýtt. Manni finnst vanta eitthvað. Maður er aldrei fullkomlega sáttur við það sem maður er að gera,“ segir Rax þegar hann talar um gerð bókarinnar Fjallland.

RAX: „Það er eins og kölski sé að horfa beint á okkur“

„Alltaf þegar ég er að fljúga þá er ég alltaf að leita að allskonar fígúrum, formum og andlitum. Ég bjóst nú reyndar ekki við því í Holuhrauni þegar ég fór þangað að sjá einhver andlit.“ Þetta segir Ragnar Axelson um reynslu sína þegar hann myndaði gosið í Holuhrauni árið 2014.






Fleiri fréttir

Sjá meira


×