Innlent

Harður árekstur og skemmdarverk í ráðhúsinu

Hólmfríður Gísladóttir skrifar
Nokkuð annríki var hjá lögreglu í nótt og hafði hún meðal annars afskipti af tveimur sem grunaðir eru um vörslu fíkniefna.
Nokkuð annríki var hjá lögreglu í nótt og hafði hún meðal annars afskipti af tveimur sem grunaðir eru um vörslu fíkniefna. Vísir/Vilhelm

Lögregla var kölluð á vettvang um kl. 21 í gærkvöldi eftir að bifreið var ekið á vegrið á Bústaðavegi með þeim afleiðingum að hún kastaðist yfir á rangan vegarhelming og framan á aðra bifreið.

Samkvæmt dagbók lögreglu ók tjónvaldur burt af vettvangi en var handtekinn skömmu síðar á heimili sínu. Er hann grunaður um ölvun við akstur og var að lokinni sýnatöku vistaður í fangageymslu lögreglu.

Tjónþoli hugðist sjálfur leita á slysadeild vegna eymsla. Bifreið hans er mikið tjónuð og var dregin af vettvangi.

Lögregla var einnig kölluð til vegna manns í annarlegu ástandi sem búinn var að brjóta brunaboða í ráðhúsinu. Hann reyndist einnig hafa tæmt úr slökkvitækjum í bílageymslu. Maðurinn var meiddur á hendi og fluttur á slysadeild.

Um kl. 22.30 var tilkynnt um útitónleika í hverfi 101 þar sem hópur fólks var saman kominn. Tónleikahaldari verður kærður fyrir brot á lögreglusamþykkt og brot á sóttvarnalögum en hann hafði ekki heimild fyrir tónleikahaldinu og þá hefur lögregla áður sinnt samskonar tilkynningum, samkvæmt dagbók.

Kl. 17 og 20 var lögregla kölluð til vegna innbrota og þjófnaðar í tvö fjölbýlishús í hverfi 220. Í fyrra tilvikinu var brotist inn í sjö geymslur og því síðara í fjórar geymslur. Hurðir voru spenntar upp og brotnar.

Í seinna tilvikinu var meðal annars stolið rafskútu og vefmyndavél.

Lögreglumál Reykjavík
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið