Ellilífeyrisþegi ættleiddur

Ítalskur ellilífeyrisþegi hefur verið ættleiddur eftir að hafa auglýst eftir „kjörforeldrum“ í dagblaði í síðasta mánuði. Hinn áttræði Giorgio Angelozzi hefur búið einn með sjö köttum rétt fyrir utan Róm síðan eiginkona hans lést árið 1992. Hann segist vera mjög einmana en hann á eina dóttur sem býr í útlöndum. Eftir að auglýsing öldungsins birtist, auk forsíðuviðtals, hrönnuðust inn svör frá fólki sem hafði áhuga á að fá „afa“ inn á heimilið. Angelozzi, sem er fyrrverandi kennari, fór vel og vandlega yfir umsóknirnar og hafði samband við þá aðila sem honum leist best á. Að lokum valdi hann hjón með tvö börn í bænum Bergamo á Norður-Ítalíu því rödd húsmóðurinnar minnir hann svo á rödd eiginkonunnar fyrrverandi.