Umbylting skipulags Sþ

Það þarf að umbylta skipulagi Sameinuðu þjóðanna, sérstaklega öryggisráðsins, að mati Geirs H. Haarde fjármálaráðherra sem í gær hélt ræðu á allsherjarþingi Sameinuðu þjóðanna í New York. Það er þéttskipaður bekkurinn í höfuðstöðvum Sameinuðu þjóðanna þessa dagana eins og alla haustdaga við setningu allsherjarþingsins. Forsætisráðherrar og eða utanríkisráðherrar allra aðildaríkjanna stíga í pontu hver á fætur öðrum og fá í þetta eina sinn á ári tækifæri til að gera grein fyrir utanríkisstefnu síns ríkis á þessum helsta samráðsvettvangi þjóða heims. Það kom í hlut Geirs Haarde fjármálaráðherra að ávarpa allsherjarþingið fyrir Íslands hönd í fjarveru Davíðs Oddssonar utanríkisráðherra en Davíð dvelur nú í Slóveníu þar sem hann situr meðal annars fundi með þarlendum ráðamönnum. Geir var seint á mælendaskrá í gærkvöldi og lagði í ræðu sinni megináherslu á að nauðsynlegt væri að umbylta skipulagi Sameinuðu þjóðanna til að gera samtökin skilvirkari. Geir sagði að Ísland myndi styðja það að öryggisráðið yrðið stækkað og að auk núverandi fimm fastaþjóða myndu Brasilía, Indland, Japan og Þýskaland fá fast sæti í ráðinu ásamt einu Afríkuríki. Geir fordæmdi einnig hryðjuverk í ræðu sinni og sagði að þau mætti aldrei réttlæta en lagði jafnframt áherslu á að baráttan gegn hryðjuverkum yrði ekki á kostnað almennra mannréttinda. Ísland hefur boðið sig fram til setu í öryggisráðinu 2009 til 2010 og Geir hefur átt annasama daga í New York við að sannfæra ráðamenn ýmissa smáríkja, meðal annars í Karíbahafi og Kyrrahafi, um það að styðja framboðið. Í gær var ennfremur skrifað undir yfirlýsingu um stofnun stjórnmálasambands við Afríkuríkið Gíneu-Bissá. Á myndinni ávarpar Geir H. Haarde allsherjarþingið í gær.