Fjáröflun fyrir börn í stríði

Ólafur Ragnar Grímsson, forseti Íslands, mun hefja fjáröflunarátak Rauða krossins fyrir börn í stríði, „Göngum til góðs“, í Smáralind nú klukkan hálfellefu. Auk forsetans munu Ellert B. Schram, forseti Íþróttasambands Íslands, Kristján Sturluson, varaformaður Rauða krossins, og Sigrún Árnadóttir, framkvæmdastjóri Rauða krossins, kynna landssöfnunina. Markmiðið er að fá tvö þúsund og fimm hundruð landsmenn til þess að skrá sig sem sjálfboðaliða til að taka þátt í tveggja klukkustunda söfnunarátaki þar sem banka á upp á hjá hverjum einasta Íslendingi, laugardaginn 2. október næstkomandi. Í tilefni af þessu verður opnuð ljósmyndasýning Þorkels Þorkelssonar, ljósmyndara Morgunblaðsins, sem tileinkuð er börnum í stríði.