Safna upplýsingum um þörf á félagslegu húsnæði

Enn liggur ekkert fyrir um það hvenær Eygló Harðardóttir, félags- og húsnæðismálaráðherra, kynnir ný þingmál um endurbætur á húsnæðiskerfinu. Sigurður Erlingsson, forstjóri Íbúðalánasjóðs, sagði við Fréttablaðið á dögunum að óvissan um framtíð sjóðsins yki á vanda hans.

„Ég vona sem fyrst. Þetta eru nokkuð fjölbreytt mál og mörg. Hér er ekki um að ræða eitt frumvarp. Þetta snýr ekki bara að einum þætti húsnæðiskerfisins, heldur koma þarna fram mjög víðtækar tillögur sem snúa að nokkrum lagabálkum,“ segir Eygló.

Hún segir að stefnt sé á að þessi mál verði kynnt vorþinginu. Megináherslan sé lögð á að vinna þau frumvörp sem voru kynnt á þingmálaskránni. Þar er boðað frumvarp til laga um húsnæðismál, frumvarp til laga um húsnæðissamvinnufélög og frumvarp til laga um breytingu á húsaleigulögum.

Eygló segir að ráðuneytið hafi leitað eftir nánu samstarfi við Samband íslenskra sveitarfélaga og sveitarfélögin og sé að viða að sér upplýsingum um áform sveitarfélaga varðandi uppbyggingu á félagslegu húsnæði fyrir fólk í félagslegum eða fjárhagslegum vanda. „Að við fáum upplýsingar um það hver sé þörfin fyrir fatlað fólk, fyrir aldraða og fyrir námsmenn. Ríkið hefur stutt sveitarfélögin eða viðkomandi félagasamtök sérstaklega varðandi uppbyggingu fyrir þessa hópa. Það má segja að fyrsta skrefið að því hafi verið tekið þegar Reykjavíkurborg samþykkti sína áætlun, um hvað byggt yrði upp á næstu fimm árum,“ segir Eygló.

Hún segir að tölur sem þessar frá sveitarfélögunum hafi ekki legið fyrir. „Og það er rétt að fara með það fyrir þingið og þingið mun þá samþykkja húsnæðisáætlun um uppbyggingu þegar kemur að félagslegu húsnæði. Síðan erum við með tillögur sem snúa að breytingu á húsnæðisbótakerfinu. Að jafna stuðninginn við þá sem búa í ólíkum búsetuformum og ólíkum fjölskyldugerðum,“ segir Eygló. Hún minnir á tillögur frá verkefnastjórn um framtíð húsnæðismála að vaxta- og húsaleigubótakerfið verði því sameinað í eitt.

Aðspurð hvort sú óvissa sem er uppi um framtíð Íbúðalánasjóðs auki á vanda hans, segist hún telja að það hafi allir áhyggjur af stöðu sjóðsins. Nú sé verið að vinna að skýrum tillögum um framtíðarskipulag. „Við höfum líka að sama skapi lagt áherslu á það við Íbúðalánasjóð að sjóðurinn sinni viðskiptavinum eins vel og hann mögulega getur og þar af leiðandi að það fólk sem á í viðskiptum við íbúðalánasjóð finni fyrir því að sjóðurinn er að huga að því,“ segir Eygló.