Haukar töpuðu stórt

Haukar biðu stóran ósigur þegar þeir sóttu þýska stórliðið Kiel heim í Meistaradeildinni í handbolta í dag. Lokatölur urðu 39-23 eftir að staðan í háfleik hafði verið 21-9 heimamönnum í vil en þeir voru dyggilega studdir áfram af 5000 áhorfendum. Ásgeir Örn Hallgrímsson og Vignir Svavarsson voru markahæstir í liði Hauka með fimm mörk. Páll Ólafsson, þjálfari Hauka, sagði eftir leikinn að Haukum hefði einfaldlega verið slátrað. Kiel, sem var án Svíans Stefan Lövgren, hefði byrjað af miklum krafti og einfaldlega valtað yfir Hauka í byrjun leiksins. Haukar þurfa því að vinna Savehof frá Svíþjóð í síðasta leik sínum í riðlinum og treysta á að Kiel vinni franska liðið Creteil til að eiga möguleika á að komast í evrópukeppni félagsliða. Kiel er hins vegar efst í riðlinum með átta stig og öruggt áfram, en Savehof hefur sex og getur þannig náð Kiel að stigum með sigri á Haukum.