Rúta fór út af veginum við Haukadalsvatn

Rúta með 26 erlenda ferðamenn innanborðs fór út af veginum við Haukadalsvatn klukkan rúmlega 17 í dag. Eitthvað var um minniháttar meiðsl meðal farþega en enginn er alvarlega slasaður, segir í fréttatilkynningu frá Slysavarnarfélaginu Landsbjörg.

Björgunarsveitin Ósk frá Búðardal var kölluð út til aðstoðar lögreglu og sjúkraliðs á slysstað en hlúa þarf að farþegum og flytja í hús Rauða krossins í Búðardal þar sem þeim verður veitt áfallahjálp. Vegfarendur er áttu leið hjá munu einnig aðstoða við flutning farþeganna.