Slegist fyrir utan Manhattan - rólegt á Airwaves

Líkamsárás átti sér stað fyrir utan veitingastaðinn Manhattan í Keflavík í nótt. Nokkrum mönnum lenti þar saman og var einn barinn í höfuðið með glasi. Hann hlaut þó ekki alvarlega áverka en ryskingarnar stöðvuðust þegar lögregla mætti á svæðið. Þá var tilkynnt um líkamsárás á skemmtistaðnum 800 bar á Selfossi um hálffjögurleytið í nótt.

Tveir ungir karlmenn tókust þar á og var öðrum þeirra skellt í járn og gistir hann nú fangageymslur lögreglunnar. Ekki var hægt að yfirheyra manninn vegna annarlegs ástands í nótt en það verður gert þegar renna tekur af honum. Mennirnir tveir voru með áverka í andliti eftir áflogin.

Þrjár minniháttar líkamsárásir áttu sér stað í miðbænum í nótt en Airwaves hátíðin var í hámarki og mikið fjölmenni í bænum. Þá voru tveir ökumenn teknir á höfuðborgarsvæðinu grunaðir um akstur undir áhrifum fíkniefna.