Íslensku víkingarnir notuðu kristalla sem siglingartæki

Íslensku víkingarnir á söguöld notuðu kristalla sem siglingartæki þegar þeir sigldu um á langskipum sínum milli landa, eða heimsálfa. Getið er um þessa kristalla sem sólarsteina á nokkrum stöðum í Íslendingasögunum.

Það var hópur alþjóðlegra vísindamanna sem rannsakaði málið en niðurstöður þeirrar rannsóknar hafa verið birtar í tímaritinu Proceedings of the Royal Society.

Í Íslendingasögunum er nokkrum sinnum minnst á sólarsteina en forfeður okkar notuðu þá til að sjá stefnu til sólar í skýjuðu veðri. Aðferðin byggist á því að slíkir steinar skauta sólarljós og því er hægt að sjá hvar sólin er á himni með þeim þótt þungskýjað sé.

Í umfjöllun BBC um rannsóknina segir að víkingarnir hafi verið duglegir sjómenn sem sigldu þúsundir kílómetra milli Norður Evrópu og Norður Ameríku án áttavita sem fyrst var fundinn upp á 13. öld. Þeir hafi því haft önnur siglingatæki til að leiðbeina sér.

Tilgátur eru uppi um að sólarsteinar hafi verið gerðir úr íslensku silfurbergi. Hinsvegar koma aðrir kristallar til álita, þar á meðal kordíerít sem finnst í suðurhluta Noregs.