Viðey ófær hjólastólum

„Það er alveg ljóst að aðgengi fatlaða er mjög ábótavant í Viðey, en þar standa hafnaraðstæður helst í vegi fyrir að fatlaðir njóti eyjunnar til jafns við aðra," segir Berglind Ólafsdóttir, skrifstofustjóri á menningar- og ferðamálasviði Reykjavíkurborgar.

Rannveig Grétarsdóttir er framkvæmdastjóri Eldingar sem á og rekur Viðeyjarferjuna. Hún segir aðgengi fatlaðra beggja vegna sundsins stórt vandamál. „Í raun er ógjörningur að koma stórum, rafknúnum hjólastólum um borð og frá borði, og næsta vonlaust að koma hjólastól upp á bryggjuna í Viðey vegna mikils hæðarmunar á flóði og fjöru. Þá liggur að flotbryggjunni í Skarfavör snarbrattur rampur, alsettur torfærum þrepum, sem hjólastólar aka ekki niður," segir Rannveig sem er með tilbúna áætlun til breytinga á bátum Eldingar miðað við þarfir fólks í hjólastólum, en bíður með framkvæmdir þar til lausn finnst í hafnarmálum.

Aðgengi fatlaðra til og frá Viðey strandar alfarið á kostnaði, segir Gísli Gíslason, hafnarstjóri hjá Faxaflóahöfnum. „Allt er hægt fyrir peninga, en framkvæmdin er afar kostnaðarsöm. Aðstæður í Viðey eru með einkar sérstökum hætti og mannvirkið sem þar var byggt á sínum tíma afar hátt. Því er snúið að breyta aðstæðum á dugandi hátt og mannvirkin flókin viðureignar," segir Gísli.

Hann segir fimm metra mun á flóði og fjöru við flotbryggjurnar sem nú þjóna Viðeyjarferjunni.

„Í lægstu stöðu er mjög bratt upp á sjálfa bryggjuna og líklegt að krani eða lyfta yrði fyrir valinu. Á svæðinu eru bryggjukranar en öryggiskröfur kveða á um annars konar búnað og miklum mun dýrari," segir Gísli.

En á hverjum myndi sá kostnaður lenda?

„Svarið er óljóst. Í samningi milli Reykjavíkurborgar og Faxaflóahafna var samið um að við byggðum mannvirki í Skarfavör og Bæjarvör hinum megin. Við sjáum því aðeins um hafnarmannvirki en ekki þau sem eru uppi á landi," útskýrir Gísli.

Hann segir núverandi mannvirki illa til þess fallin að leysa vandann og staðsetning bryggjunnar í Viðey ekki endilega þá bestu þótt hún sé í skemmstri fjarlægð á milli lands og eyjar.

„Í Viðeyjarhöfn er mikill sjógangur og við náttúruöflin að glíma. Því þarf að gera miklar öryggiskröfur og vanda til verka, en auðvelt að leysa vandann ef nógur aur er til þess. Þetta er ekki fjárfesting sem menn horfa í hvort svari kostnaði, enda ekki hægt að meta lífsgæði fatlaðra til fjár."

Berglind Ólafsdóttir segir að kostnaðaráætlun og lausnir frá Faxaflóahöfnum yrðu strax skoðaðar jákvætt hjá borginni. „Þá verður undir eins athugað hvort við fáum fjármuni og heimild til að verja þeim í slíka framkvæmd, og í framhaldi hefja úrbætur á aðgengi fatlaðra í eynni, eins og léttari leið upp brekkuna að Viðeyjarstofu og lyftuhúsi aftan á Viðeyjarstofu sem opnar loks aðgang fatlaðra að salernum í kjallara hússins. Draumurinn er að fatlaðir komist í Viðey á eigin vegum sem fyrst, en þangað til tökum við vel á móti þeim og aðstoðum eftir þörfum."

thordis@frettabladid.is