Hæstaréttardómari sýknaður í Héraðsdómi

Viðar Már Matthíasson hæstaréttardómari var í dag sýknaður af kröfum Lánasjóðs íslenzkra námsmanna. Sjóðurinn krafðist ógildingar á úrskurði málskotsnefndar lánasjóðsins, sem úrskurðaði að ábyrgð sem hann hafði gengist í á námsláni árið 1982 væri úr gildi fallin.

Þessu vildi LÍN ekki una og fór því með málið fyrir rétt. Lánið sem Viðar skrifaði upp á var með tuttugu ára uppgreiðslutíma en þá greiddi lánþegi af láninu í tuttugu ár en að því loknu féllu eftirstöðvarnar niður. Ágreiningur var hinsvegar um hvort ábyrgð Viðars ætti að falla niður að tuttugu árum liðnum og vildi sjóðurinn ekki sætta sig við það, þrátt fyrir úrskurð málskotsnefndarinnar.

Dómarinn komst hinsvegar að því að úrskurður nefndarinnar ætti að standa og því var Viðar Már sýknaður af kröfum LÍN í málinu.