Ólæti og umgengni ógna tjaldsvæði

Samkvæmt greinargerð um rekstur tjaldsvæðanna á Akureyri um síðastliðna verslunarmannahelgi þarf annaðhvort að loka tjaldsvæðinu í nágrenni sundlaugar bæjarins eða ráðast í umfangsmiklar og fjárfrekar endurbætur. Greinargerðin hefur verið lögð fyrir bæjarráð, sem vísaði henni til framkvæmdaráðs þar sem hún er nú til efnislegrar meðferðar. Samkvæmt heimildum blaðsins er líklegt að niðurstaðan verði sú að tjaldsvæðinu verði lokað innan fárra ára frekar en að lagt verði út í mikinn kostnað við endurbætur. Umgengni um tjaldsvæðið við Þórunnarstræti á Akureyri, í nágrenni sundlaugarinnar, hefur löngum þótt slæm þegar mikill fjöldi hefur verið saman kominn á svæðinu. Íbúum í nágrenni svæðisins fannst keyra um þverbak um verslunarmannahelgina síðastliðið sumar og komu á framfæri kvörtunum við bæjaryfirvöld. Mikið var um skemmdarverk á svæðinu en að minnsta kosti fimm salerni voru brotin, sem og skilrúm og hurðir að salernisaðstöðu. Tjaldsvæðið var yfirfullt en þá voru þar 1.400 gestir; að mestu ungt fólk. "Þrátt fyrir verulegan viðbúnað við Þórunnarstræti varð staðan þannig um verslunarmannahelgina að ekki er hægt að sætta sig við það til frambúðar," segir í greinargerðinni en það var stjórn tjaldsvæðanna sem tók hana saman. Í greinargerðinni er minnst á gamla hugmynd um nýtingu tjaldsvæðisins við Þórunnarstræti en hún gengur út á að gera svæðið að "lúxustjaldsvæði", fyrir tiltölulega fáa gesti, þar sem gistigjald væri töluvert hærra en á öðrum tjaldsvæðum bæjarins. Stjórnin telur tjaldsvæðið við Þórunnarstræti lítt aðlaðandi sem gistisvæði, eins og það nú er, og telur vel koma til greina að loka því alfarið. Sú ákvörðun er í höndum bæjaryfirvalda og leggur stjórn tjaldsvæðanna til að ákvörðun um framtíð tjaldsvæðisins verði tekin fyrir áramót.