Hitti naglann á höfuðið

Framkvæmdastjóri stærsta fiskvinnslufyrirtækis Bretlands segir Halldór Ásgrímsson utanríkisráðherra hafa hitt naglann á höfuðið í beinskeyttri gagnrýni sinni á sjávarútvegsstefnu Evrópusambandsins. Hann segist vona að gagnrýni Halldórs eigi eftir að berast víða um Evrópusambandið. Ræða Halldórs Ásgrímssonar á sjávarútvegsráðstefnu Íslandsbanka á Akureyri í gær hefur vakið mikla athygli. Halldór skaut föstum skotum að fiskveiðistefnu Evrópusambandsins, sagði hana úrelta og í kreppu. Hann sagði afleiðingar stefnunnar vera ofveiði, offjárfestingar og aukið brottkast. Halldór sagði ennfremur að afstöðu sambandsins gagnvart fiskveiðiþjóðum Norður- Evrópu mætti líkja við nýlendustefnu. Winne Griffiths, forstjóri Young Bluecrest, sem er langstærsta félag í áframvinnslu sjávarafurða í Bretlandi og veltir um 60 milljörðum króna á ári, segist hafa hrifist mjög af hreinskilni Halldórs. „Hann kom sjónarmiðum sínum mjög kröftuglega á framfæri. Sem forstjóri stærsta sjávarafurðafyrirtækis Bretlands tek ég heils hugar undir það sem hann sagði,“ segir Griffiths. Hann segist jafnframt vona að orð Halldórs berist út innan ESB. Halldór sagði í viðtali við fréttastofu Stöðvar 2 í gær að við núverandi kringumstæður geti Íslendingar ekki sótt um aðild að Evrópusambandinu. Griffiths tekur undir þau sjónarmið Halldórs. „Það væri mjög erfitt fyri Íslendinga að sækja um ef ESB ætlaði að stjórna jafn mikilvægum þáttum og íslenskum sjávarútvegi.“ Halldór sagði í gær að Evrópusambandið yrði að koma til móts við fiskveiðiþjóðir Norður- Evrópu svo þær sjái sér hag í að sækja um aðild að sambandinu. Andrés Pétursson, formaður Evrópusamtakanna, er efins um samningsstöðu Íslands gagnvart Evrópusambandinu. Hann segir að ef við viljum albönsku leiðina, að útiloka okkur í Norður-Atlantshafi, þá muni ESB bara segja: Verði ykkur að góðu.