Arshavin með tvennu í sigri Arsenal

Fyrstu leikirnir í Emirates-bikarnum fóru fram í dag þegar Arsenal vann Atletico Madrid 2-1 og Rangers vann Paris St. Germain 1-0.

Bæði Arsenal og Atletico Madrid stilltu upp sterkum byrjunarliðum í dag en staðan var markalaus þegar flautað var til hálfleiks.

Það stefndi reyndar lengi vel í markalaust jafntefli þegar Andrey Arshavin, sem kom inná á 66. mínútu, opnaði markareikninginn fyrir Arsenal á 86. mínútu.

German Pacheco náði svo að jafna metin á 88. mínútu áður en Arshavin skoraði sigurmarkið stuttu síðar, 2-1.

Madjid Bougherra skoraði eina mark leiksins þegar Rangers vann Paris St. Germain. Arsenal og Rangers mætast svo á morgun og þá tekur Atletico Madrid á móti Paris St. Germain.