Rauðvínið reyndist vera amfetamínbasi

Þrjátíu og sjö ára karlmaður, Daniel Danielewicz, kvaðst fyrir Héraðsdómi Reykjaness í gær hafa talið sig vera að færa samlanda sínum hér á landi rauðvín, skinku, bjúgu og lyf, þegar hann kom til landsins í ágúst síðastliðnum. Í „rauðvínsflöskunni“ reyndist vera rúmlega einn lítri af amfetamínvökva. Úr honum hefði mátt vinna rúmlega átta kíló af amfetamíni, sem hægt hefði verið að selja fyrir 25 milljónir króna, að því er fram kom hjá saksóknara í málinu, Júlíusi Kristni Magnússyni.

Maðurinn, sem er pólskur ríkis­borgari og var að koma frá Póllandi, bar fyrir rétti í gær að hann hefði ekki haft hugmynd um hvað var í flöskunni.

„Ég kom hingað af því að mér hafði verið lofað að ég fengi vinnu á Íslandi,“ sagði hann. „Kunningi minn í Póllandi, Pawo, lét mig hafa þessar upplýsingar,“ bætti maðurinn við en kvaðst ekki vita eftirnafn kunningjans.

Hann sagði að Pawo hefði sagt sér að á Íslandi væri maður, einnig pólskur, sem gæti útvegað vinnu. Sá maður hefði greitt fyrir farið til Íslands.

„Ég þurfti bara að sýna passa á flugvellinum,“ útskýrði flutningsmaður amfetamínsins, sem sagði flugmiðann til Íslands hafa beðið sín þar. „Pawo lét mig hafa flöskuna, eitthvað matarkyns og lyfin, sem ég átti að afhenda manninum á Íslandi. Ég var ekkert að velta því fyrir mér hvað væri í flöskunni.“

Maðurinn kvaðst hafa átt að fá vinnu við rafvirkjun hér. Sér hefði verið sagt að búið væri að ganga frá öllu varðandi dvölina hér. Hann hefði átt að gista á hóteli fyrstu nóttina en síðan í fyrirtækinu sem hann fengi vinnu hjá. Þar væri gistiaðstaða fyrir hendi. Spurður um þann sem átti að útvega honum vinnuna sagði hann að sá héti Polec. Eftirnafnið vissi hann ekki, hafði aldrei séð manninn og þekkti ekkert til hans.

Jón Halldór Sigurðsson rannsóknarlögreglumaður sem bar vitni í héraðsdómi sagði að greinilega hefði verið föndrað við flöskuna með amfetamínvökvanum. Meðal annars hefði sílikonkítti verið komið fyrir í innsigli hennar svo hún læki öruggglega ekki.

Halla Geirlaug Gunnlaugsdóttir tollvörður sagði að flaskan og fatnaður hefðu verið í tösku mannsins. Hún kvaðst hvorki minnast matvæla né lyfja í töskunni.

jss@frettabladid.is