Hægt að skila Jónínu í Office 1

Ævisaga Jónínu Benediktsdóttur sem hingað til hefur aðeins fengist hjá N1 fæst nú einnig í verslunum Office 1. Nokkra athygli hefur vakið að ekki er hægt að skipta bókinni hjá N1. Það er hins vegar hægt hjá Office 1.

Erling Valur Ingason, markaðsstjóri Office 1, segir að í tilefni þess að verslanirnar hafa tekið bókina til sölu verður hún á hálfvirði í dag. Venjulegt verð á bókinni í N1 er 3.980 krónur en í dag verður hún seld á 1.990 krónur í Office 1.

„Við höfum tryggt Jónínu pláss í hillunum hjá okkur ásamt úrvali jólabóka sem við munum sprikla með verðið á. Það er mikil samkeppni í bóksölu á þessum tíma og við höfum ætíð sótt fram af krafti fyrir jólin. Við leggjum áherslu á framúrskarandi þjónustu við viðskiptavini og eins og áður leggjum við áherslu á að skiptimiðinn skiptir ekki máli enda geta landsmenn skipt bókum í Office 1 eftir jólin hvar svo sem þær voru keyptar," segir Erling.