Fasteignaskattstekjur aukast mikið

Tekjur sveitarfélaga af fasteignasköttum gætu aukist um meira en einn milljarð króna á næsta ári vegna hækkunar fasteignaverðs. Fasteignaskattar eru næststærsti tekjustofn sveitarfélaganna á eftir útsvarinu og skila þeim u.þ.b. 11 milljörðum króna á þessu ári í sveitarsjóðina. Þeir taka hins vegar mið af fasteignaverði. Í desembermánuði ár hvert er fasteignamat framreiknað með hliðsjón af breytingu fasteignaverðs á markaði. Álagningarstofn fasteignaskatta breytist í samræmi við þann framreikning. Enn er of snemmt að slá nokkru föstu um líklega hækkun. Það er þó ákveðin vísbending að við síðasta útreikning vísitölu neysluverðs mældi Hagstofan tæplega níu prósenta hækkun fasteignaverðs á landinu öllu á síðustu tólf mánuðum, frá september í fyrra til sama mánaðar í ár. Slík hækkun fasteignamats skilar sveitarfélögum um eins milljarðs króna skattahækkun, haldi þau álagningarprósentum óbreyttum. Miklar hækkanir á fasteignamarkaði, sem margir þykjast skynja á allra síðustu vikum, eiga eftir að koma inn í útreikninginn en þær gætu þýtt að sveitarfélögin fengju enn hærri búbót.