Björgunarsveitir kallaðar út

Björgunarsveitir hafa verið kallaðar út til að aðstoða fólk sem lent hefur í vandræðum í bílum sínum vegna ófærðar og illviðris sem gengur nú yfir norðaustanvert landið. Mjög hvasst er einnig í vindhviðum vestur eftir Suðurströndinni. Flestir fjallvegir á Austfjörðum eru illfærir eða jafnvel ófærir, auk þess sem skyggni er afar slæmt vegna hvassviðris og skafrennings. Hálka er líka um norðanvert landið og á Vestfjörðum. Stór dráttarbíll með tengivagn valt í mikilli vindhviðu þegar bíllinn, sem var á austurleið, átti skammt ófarið að Kirkjubæjarklaustri um klukkan sex í morgun. Ökumanninn sakaði ekki en bíllinn lagðist á hliðina og lokaði veginum. Vagninn, sem var tómur, hafnaði utan vegar. Vegfarendur komust framhjá vettvangi um Hrífunesveg. Með stórvirkum vinnuvélum hefur nú tekist að koma bílnum á réttan kjöl og opna veginn á ný. Mikið hvassviðri er á Mýrdalssandi með sandfoki og snjófjúki og undir Landeyjum hefur gengið á með miklum rokum. Í einni slíkri fauk kerra, sem var aftan í stórum flutningabíl, á bílinn á móts við Þorvaldseyri en ökumann sakaði ekki. Lögreglan á Hvolsvelli varar fólk við að fara þar um á léttum bílum. Spáð er hvassviðri á Austurlandi fram undir kvöld. Hálkublettir eru auk þess víða á Vesturlandi og undir Hafnarfjalli hafa bílar lent í vandræðum vegna hvassviðris.