Hærri skattur á áfengi

Heilbrigðis- og félagsmálaráðherrar Norðurlandanna samþykktu á fundi sínum um áfengismál í morgun að leggja til aukna skattlagningu á áfengi. Jón Kristjánsson heilbrigðisráðherra segir þetta þó ekki þýða að skattar á áfengi hækki hér á landi, enda séu þeir ærnir fyrir. Jón Kristjánsson, heilbrigðis-og tryggingamálaráðherra, stýrði ráðherrafundinum í Kaupmannahöfn en til hans var boðað vegna tilmæla forsætisráðherra Norðurlandanna þess efnis að ráðherrar heilbrigðis-og félagsmála fjölluðu sérstaklega um áfengismálastefnu á vettvangi sínum og skiluðu forsætisráðherrunum skýrslu um málið fyrir nóvemberfund ráðherranna. Norrænu heilbrigðis-og félagsmálaráðherrarnir sendu frá sér yfirlýsingu að loknum fundinum á Norðurbryggju þar sem hvatt var til aukinnar samvinnu í áfengismálum á vettvangi Norðurlandanna. Þar segir að áfengi sé ekki venjuleg vara og það þurfi að berjast gegn vaxandi áfengisneyslu á forsendum lýðheilsu að sögn Jóns Kristjánssonar. Einnig að það þurfi að hækka áfengisskattana verulega. Spurður hvort búast megi við að áfengisverð hækki hér enn segir Jón að hér á landi séu skattarnir mjög háir þannig að það snerti okkur ekki mikið. Hann segir hins vegar engar ákveðnar tölur hafa verið nefndar í þessu efni.