Harma umræðu um manneklu

Trúnaðarmenn leikskólakennara í Reykjavík taka undir yfirlýsingu stjórnar Félags leikskólakennara og telja miður í hvaða farveg umræðan um manneklu í leikskólum hefur farið. Í ályktun fundar trúnaðarmanna segir að leikskólar hafi haldið deildum og faglegu starfi skólanna gangandi eins lengi og mögulegt sé áður en gripið hefur verið til þeirra örþrifaráða að loka deildum eða senda börn heim. Svo segir: „Viðmið um barnafjölda og kjarasamningsbundin réttindi verður að virða. Það er óviðunandi að mannekla herji á leikskólana ár hvert. Það dregur úr þjónustu og faglegu starfi leikskólanna er hætta búin. Það eiga leikskólakennarar sem starfa á grunni faglegrar þekkingar erfitt með að sætta sig við. Auk þess veldur endalaus endurnýjun á starfsfólki álagi sem hefur slæm áhrif á börn og það starfsfólk sem fyrir er. Ástæða þeirrar manneklu sem við blasir er fyrst og fremst bág launakjör leikskólakennara og annars starfsfólks. Eina raunhæfa lausnin eru kjarabætur til handa þeim sem vinna þetta mikilvæga starf. Ennfremur þurfa yfirvöld að vinna að því að fjölga leikskólakennurum. Leikskólakennarar munu leggja metnað sinn í að viðhalda faglegu starfi þrátt fyrir þetta erfiða tímabil sem nú stendur yfir með þá von að úr rætist og leitað verði varanlegra lausna,“ segir í ályktun trúnaðarmanna.