Vinnuvélabraskarar nýta neyð Íslendinga

Hjálmar Helgason, eigandi Vélafls, segir fyrirtækið hafa selt gríðarmikið af vinnuvélum úr landi eftir bankahrunið. „Ég hef ekki töluna á vélunum sem við höfum selt síðan í október en í síðustu viku seldum við fjórtán vélar úr landi,“ segir Hjálmar. Frá því hrunið varð í október hefur Vélafl haft stórt svæði við Hafnarfjarðarhöfn þar sem notaðar og verkefnalausar vinnuvélar standa í löngum röðum. Hjálmar kveður fyrirtækið selja eigin vélar og vélar fyrir einstaklinga, verktaka og fjármögnunarfyrirtækin. Útlendingar séu mjög iðnir að notfæra sér ástandið. „Við fáum nokkra erlenda gesti í hverri viku sem eru að skoða og kaupa. Það er alþekkt að það kemur hafsjór af mönnum yfir land sem er í þessari stöðu. Það sama gerðist í Finnlandi í kreppu þar 1995. Þá flugu vélabraskarar þangað á mánudögum og keyptu og keyptu af mönnum sem voru í neyð og flugu svo aftur heim á föstudögum,“ segir Hjálmar og bendir á að staðan á verktakamarkaðnum sé auðvitað mjög erfið og mikil yfirgeta í kerfinu. „Enda er innflutningur síðustu ára búinn að vera fáránlega mikill. Margir hafa lent í vandræðum og viljað minnkað við sig fjárfestingu eins og hægt hefur verið en sumur hafa því miður misst tækin.“ Aðspurður segir Hjálmar að það verð sem fáist fyrir vélarnar með sölu úr landi sé ekki gott þótt fall krónunnar hjálpi mikið til. Í landinu sé einfaldlega enn svo mikið af verkefnalausum vinnuvélum og vörubílum að verðið sé afar lágt. „Ég held að um áramótin hafi verið um tólf hundruð beltagröfur í landinu. Ég veit ekki hversu mikið þeim hefur fækkað en giska á að um 25 til 30 prósent þessara tækja sé í notkun í dag. Í þessari stöðu er hægt að gera góð kaup, auk þess sem það er talsvert af verkum í gangi og aðeins að lifna yfir markaðnum hér innanlands. Á morgun [í dag] er Vegagerðin til dæmis að skrifa undir 850 milljóna króna verk á Austurlandi,“ segir Hjálmar. Að sögn Hjálmars eru ýmis önnur tæki en vinnuvélar og vörubílar seld úr landi, meðal annars fólksbílar og rútur. „Ég veit um menn sem hafa keypt sportbáta og verið að baksa við að setja þá upp á vörubíla sem er verið að flytja út,“ segir Hjálmar. Margar vinnuvélanna eru seldar til Hollands þaðan sem þær fara til viðtakenda um víða veröld. „Sjálfir höfum við líka selt vélar til Rússlands, Póllands, Afríku og til Mið-Austurlanda,“ nefnir Hjálmar sem dæmi. gar@frettabladid.is