Beit lögreglumann í lærið

Héraðsdómur Reykjaness hefur dæmt karlmann í fimm mánaða skilorðsbundið fangelsi fyrir að ráðast á lögregluþjón og bíta hann í lærið. Atvikið átti sér stað fyrir skemmtistaðinn Áttuna í Hafnarfirði í nóvember í fyrra.

Þangað var lögregla kvödd vegna þess að tilkynnt hafði verið um að maðurinn sem ákærður var hefði unnið skemmdarverk á skemmtistaðnum. Hann reyndist hins vegar viðskotaillur þegar lögregla ræddi við hann og færðu tveir lögreglumenn hann inn í lögreglubíl. Þegar verið var að koma honum fyrir beit hann annan lögreglumanninn í lærið.

Maðurinn sagðist við yfirheyrslur ekki minnast þess að hafa bitið af ásetningi í læri lögreglumannsins. Hann aftók hins vegar ekki að það kynni að hafa gerst í hita leiksins en honum hafi fundist verulega að sér þjarmað í aftursæti lögreglubifreiðarinnar.

Út frá framburði lögregluþjónanna og áverkum á öðrum þeirra þótti dómnum sannað að maðurinn hefði bitið lögreglumanninn. Maðurinn rauf með árásinni skilorð dóms vegna tveggja líkamsárása og var tekið tillit til þess við ákvörðun refsingar.