Grunaður um að landa framhjá vigt

Lögreglumenn úr Borgarnesi stöðvuðu í morgun bíl, að beiðni Fiskistofu, þar sem grunur leikur á að hann hafi verið að flytja fisk, sem landað hafi verið framhjá vigt á Arnarstapa snemma í morgun.

Slíkt er lögbrot og því var kallað á lögreglu. Lögregla fylgdi bílnum niður á Akranes, þar sem verið er að vigta fiskinn á löggiltri vigt og kemur hið sanna þá í ljós.

Eitthvað á þriðja hundrað mál af þessum toga hafa komið upp á árinu, sem mörg hver má reyndar rekja til mistaka eða misskilnings, en þó nokkrir bátar hafa verið sviptir veiðileyfum tímabundið fyrir svona brot.