6 vikur og 500 milljónir

Verkfall grunnskólakennara var blásið af í dag og á mánudag mæta rúmlega 4000 kennarar og 45 þúsund skólabörn til starfa eftir 6 vikna fjarveru. Hátt í hálfur milljarður króna hefur verið greiddur úr verkfallssjóði kennara. Þegar kennarar mæta til starfa á mánudag hafa þeir verið frá vinnu í 42 daga, eða sléttar 6 vikur. Verkfallið stóð í 30 virka kennsludaga. Þegar til þess er litið að lögum samkvæmt skulu kennsludagar á ári hverju vera 170, er ljóst að tæp18 prósent skólaársins hafa farið forgörðum. Foreldrar hafa ekki enn fengið svör við því hvernig börnum verði bætt þetta tap, en Bergþóra Valsdóttir, framkvæmdastjóri Samfoks, segir að á næsta fundi fræðsluráðs, verði krafist svara við þeirri spurningu. Á þessum sex vikum sem verkfallið hefur staðið hafa kennarar fengið greiddar þrjú þúsund krónur á dag úr verkfallssjóði. Það þýðir að allt í allt hefur um hálfur milljarður króna verið greiddur úr verkfallssjóði. Í honum voru 900 milljónir í upphafi verkfalls, og því ljóst að verulega hefur gengið á sjóðinn að undanförnu. Kennarar fullyrða hins vegar að öðru gegni um baráttuþrekið. Það hafi verið óskert til síðasta dags verkfallsins.